27–31 დეკემბერს საქართველოში ამინდი მნიშვნელოვნად გაუარესდება. გარემოს ეროვნული სააგენტოს ინფორმაციით, ქვეყნის ტერიტორიაზე ცივი და ნოტიო ჰაერის მასები გავრცელდება, რასაც დროგამოშვებით ნალექი მოჰყვება, ზოგან კი ძლიერი, უმეტესად თოვლის სახით.
მეტეოროლოგების 0პროგნოზით, მოსალოდნელია ქარის გაძლიერება, მთიან რაიონებში – ნისლი და ქარბუქი, ხოლო საავტომობილო გზებზე ლიპყინული. 29-30 დეკემბერს სანაპირო ზონებში შესაძლებელია ელჭექი, ზღვაზე კი 4-6 ბალიანი შტორმი. ქვეყნის მაღალმთიან რეგიონებში ზვავსაშიშროების საფრთხეა.
დიდთოვლობის, ხილვადობის გაუარესების, ქარბუქის, ლიპყინულისა და ზვავსაშიშროების გამო, საავტომობილო გზების ცალკეულ მონაკვეთებზე შესაძლოა დროებით შეიზღუდოს ტრანსპორტის მოძრაობა.
ამასთან, მოსალოდნელმა ინტენსიურმა ნალექებმა დასავლეთ საქართველოს მდინარეებზე შესაძლოა წყლის დონეების მნიშვნელოვანი მატება გამოიწვიოს. სპეციალისტების შეფასებით, ამ ეტაპზე საფრთხის დონე საშუალოა.
შესაბამისი სამსახურები მოსახლეობას მოუწოდებენ, გამოიჩინონ სიფრთხილე, განსაკუთრებით მთიან და მაღალმთიან რეგიონებში გადაადგილებისას, და გაითვალისწინონ ოფიციალური გაფრთხილებები.
