მადლობა – “ქართული ოცნების” დეპუტატები საკრებულოს სხდომაზე სწორედ ამ სიტყვით იწყებდნენ გამოსვლას, რის შემდეგაც ბათუმის მერს “ეფექტური მუშაობისთვის” არაერთი ეპითეტით ამკობდნენ.
მათი მტკიცებით, თოვლის შედეგად ბათუმში მხოლოდ უმნიშვნელო პრობლემები შეიქმნა და რეალურად “ყველაფერი რიგზე” იყო. ზოგიერთი მათგანის თქმით, რამდენიმე დღე არ უძინიათ და სახლში არ დაბრუნებულან; ისინი მერიის თანამშრომლებთან ერთად ქუჩაში თოვლს წმენდიდნენ.
ერთ-ერთმა დეპუტატმა თქვა, რომ ძვირადღირებული სპეცტექნიკის ყიდვის წინააღმდეგია, რადგან მისი მოვლა პატრონობა თანხებთან არის დაკავშირებული. ამავე დეპუტატმა, ზურაბ ნაკაიძემ, მოქალაქეებსაც უსაყვედურა და განაცხადა: “თურმე კომფორტი არ ჰქონდათ, მანქანით ვერ გამოვიდნენ და ილანძღებოდნენ ზოგიერთი სოციალურ ქსელში”.
“თურმე კომფორტი არ ჰქონდათ, მანქანით ვერ გამოვიდნენ და ილანძღებოდნენ ზოგიერთები სოციალურ ქსელში. წინაღმდეგი ვიქნები, რომ 4 დღის გამო ვიყიდოთ ჩვენ 10 და 20 მილიონიანი ტეხნიკა და დავაყენოთ 4-5 წელი ტყვილა, შემდეგ კი ვიხადოთ შენახვის ხარჯები. ეს არასწორია, ამას ყველა აუდიტი დაგვიწერს, რომ არასწორია. წინაღმდეგი ვიქნები, რომ 4 დღის გამო ვიყიდოთ ჩვენ 10 და 20 მილიონიანი ტეხნიკა და დავაყენოთ 4-5 წელი ტყვილა, შემდეგ კი ვიხადოთ შენახვის ხარჯები. ეს არასწორია, ამას ყველა აუდიტი დაგვიწერს, რომ არასწორია,” – განაცხადა “ქართული ოცნების” დეპუტატმა, ზურაბ ნაკაიძემ ბათუმის საკრებულოს სხდომაზე.
ბათუმის საკრებულოს სხდომაზე პარტია “ლელოს” წევრმა, ვაჟა დარჩიამ, მმართველი პარტია მწვავედ გააკრიტიკა. ის ყურადღებას არასაკმარისად გაწმენდილ გზებსა და ტროტუარებზე, მუნიციპალური ტრანსპორტის არარსებობაზე, სკოლებისა და ბაღების დახურვაზე ამახვილებდა. დარჩიას თქმით, პროცესი არაორგანიზებული იყო, რაც ამ დღეებში განსაკუთრებით გამოჩნდა.
