„ქართული ოცნების“ პროკურატურა აცხადებს, რომ ქოლ-ცენტრების საქმიანობასთან დაკავშირებული მორიგი მასშტაბური დანაშაულებრივი სქემა გამოავლინა.
უწყების ინფორმაციით, ორგანიზებული ჯგუფის მიერ ჩადენილი თაღლითობისა და ფულის გათეთრების ფაქტებზე სისხლისსამართლებრივი დევნა ათი პირის მიმართ დაიწყო.
პროკურატურის ცნობით, ბრალდება დაუსწრებლად წარედგინებათ მიმალვაში მყოფ საქართველოს ყოფილ გენერალურ პროკურორს ოთარ ფარცხალაძე და მისი ჯგუფის წევრებს – დავით მიქაძეს, ირაკლი სეხნიაშვილს და მიხეილ ჩოხელს. ამასთან, ბრალდების დადგენილება პირადად გაეცნობა სხვა სისხლის სამართლის საქმეზე სასჯელაღსრულების დაწესებულებაში მყოფ გიორგი მიქაძეს.
ამავე საქმეზე დაკავებულია ორგანიზებული ჟურნალისტი ელისო კილაძე. ბრალდების დადგენილება ასევე წარედგინებათ გივი ჯიბლაძეს, ბენ ანორს, თორნიკე ჯანელიძესა და გიორგი კამლაძეს, რომლებმაც, პროკურატურის განცხადებით, ქმედითად ითანამშრომლეს გამოძიებასთან, აღიარეს ჩადენილი დანაშაული და ხელი შეუწყვეს ტრანსნაციონალური დანაშაულის გახსნას.
უწყება განმარტავს, რომ 2020-2023 წლებში საქართველოში, მიუხედავად დეკლარირებული სამართლებრივი ბრძოლისა, მოქმედებდა რამდენიმე ათეული თაღლითური ქოლ-ცენტრი. გამოძიების ვერსიით, მათი ნაწილი მფარველობით სარგებლობდა და ორგანიზებულად ახორციელებდა მოქალაქეების მოტყუებას ყალბი საინვესტიციო პლატფორმების გამოყენებით.
გამოძიებით დადგენილია, რომ ორგანიზებულმა ჯგუფმა უცხო ქვეყნის ორასზე მეტი მოქალაქის კუთვნილ, დაახლოებით 9.5 მილიონი აშშ დოლარის ღირებულების კრიპტოვალუტას მოტყუებით დაეუფლა.
უკანონო შემოსავლის ლეგალიზაცია ხდებოდა ვირტუალური აქტივების დანაწევრებით, მრავალჯერადი ტრანზაქციებითა და შემდგომ მათი კონვერტაციით, რის შედეგად მიღებული თანხები, პროკურატურის ცნობით, გამოიყენებოდა როგორც ქოლ-ცენტრების საქმიანობის, ისე უძრავ-მოძრავი ქონების შესაძენად.
საქმეზე ბრალდებულებს საქართველოს სისხლის სამართლის კოდექსის 180-ე და 194-ე მუხლებით გათვალისწინებული პასუხისმგებლობა ეკისრებათ, რაც 9-დან 12 წლამდე თავისუფლების აღკვეთას ითვალისწინებს. პროკურატურა სასამართლოს მიმართავს პატიმრობისა და გირაოს შეფარდების მოთხოვნით, ხოლო გამოძიება და საერთაშორისო თანამშრომლობა სხვა შესაძლო ფიგურანტებისა და დაზარალებულების გამოვლენის მიზნით გრძელდება.
