ფიზიკური პირებისთვის ქონების გადასახადის გადახდის არსებული 40 000-ლარიანი ზღვარი 100 000 ლარამდე გაიზრდება. გადაწყვეტილების შესახებ საპარლამენტო უმრავლესობის ლიდერმა ირაკლი კირცხალიამ განაცხადა. მისი თქმით, 40 000-ლარიანი ზღვარი გაუქმდება და ქონების გადასახადის ვალდებულება მხოლოდ იმ მოქალაქეებზე გავრცელდება, რომელთა შემოსავალიც 100 000 ლარს აღემატება.
„ფინანსთა სამინისტროსთან აქტიურ კოორდინაციაში მივიღეთ გადაწყვეტილება, რომელიც დაჩქარებული წესით იქნება მიღებული. 40 000-ლარიანი ზღვარი საერთოდ გაუქმდება და ქონების გადასახადი მხოლოდ 100 ათას ლარზე და ზემოთ შემოსავლიან მოქალაქეებზე შენარჩუნდება“, – განაცხადა კირცხალიამ.
მისივე ინფორმაციით, ცვლილების შედეგად დაახლოებით 81 000 მოქალაქეს ქონების გადასახადის გადახდა აღარ მოუწევს. ქონების გადასახადის მოდელის ცვლილებაზე მსჯელობა რამდენიმე კვირაა მიმდინარეობს. პარლამენტის საფინანსო-საბიუჯეტო კომიტეტის თავმჯდომარის, პაატა კვიჟინაძის განცხადებით, განხილული იყო ოთხი შესაძლო მოდელი და საბოლოო ცვლილებები კანონპროექტის სახით პარლამენტს უნდა წარედგინოს.
ფინანსთა სამინისტროს მონაცემებით, 2025 წელს ფიზიკურმა პირებმა ქონების გადასახადის სახით 120.7 მილიონი ლარი გადაიხადეს. ეს წინა წლის მაჩვენებელზე დაახლოებით 30%-ით მეტია.
ქონების გადასახადიდან მიღებული თანხა ადგილობრივი მუნიციპალიტეტების ბიუჯეტებში მიიმართება. მოქმედი წესით, გადასახადს ის მოქალაქეები ან ოჯახები იხდიან, რომელთა დასაბეგრი შემოსავალიც 40 000 ლარს აღემატება.
