„ქართული ოცნების“ აჭარის მთავრობის ინფორმაციით, დაბა ჩაქვის ტერიტორიაზე მიუსაფარ ცხოველთა თავშესაფრის კომპლექსის მშენებლობა დაიწყო. პროექტის მიხედვით, 26 696 კვადრატულ მეტრ ფართობზე ორი იდენტური ბლოკი მოეწყობა.
თავშესაფარში განთავსდება 180 დამოუკიდებელი ვოლიერი, რომლებიც აღჭურვილი იქნება წყალმომარაგებისა და სადრენაჟე სისტემებით. ნაგებობის ცენტრალურ ნაწილში დაგეგმილია ძაღლების გასასეირნებელი შიდა ეზოს მოწყობა.
ოფიციალური ინფორმაციით, კომპლექსი მოიცავს რვა დამხმარე შენობას, მათ შორის – ვეტერინარულ, ადმინისტრაციულ, საკარანტინო, სამზარეულო, „გრუმინგის“ და ძაღლების სასტუმრო ბლოკებს. ტერიტორიაზე ასევე მოეწყობა ძაღლების სავარჯიშო სივრცე. ხელშეკრულების თანახმად, მშენებლობა 2026 წლის 10 დეკემბრამდე უნდა დასრულდეს. პროექტის სავარაუდო ღირებულება ცხრა მილიონ ლარამდეა.
პროექტის პრეზენტაცია მედიის გარეშე გაიმართა, რის გამოც ჟურნალისტებს დამატებითი კითხვების დასმის შესაძლებლობა არ ჰქონდათ.
გავრცელებულ მასალაში არ არის განმარტებული, რატომ შეიცვალა თავშესაფრის მშენებლობის ადგილი და ასევე, პროექტის სახელწოდება. აღსანიშნავია, რომ აჭარის მთავრობის ყოფილი თავმჯდომარე თორნიკე რიჟვაძე წინასაარჩევნოდ აცხადებდა, რომ ჩაქვში „კუპატას“ სახელობის თავშესაფარი აშენდებოდა, თუმცა აღნიშნული დაპირება არ შესრულდა.
ინფორმაციისთვის: „კუპატას“ სახელობის თავშესაფრისა და იპოდრომის მშენებლობა ჩაქვში, ბოტანიკური ბაღის მიმდებარე ტერიტორიაზე იგეგმებოდა. ბათუმის მერიის მიერ გამოცხადებული ბოლო ტენდერი არ შედგა – მასში მონაწილეობა არავინ მიიღო.
ცნობისთვის: კუპატა იყო ბათუმში მცხოვრები მიუსაფარი ძაღლი, რომელიც მელიქიშვილის ქუჩაზე ბავშვებს გზის უსაფრთხოდ გადაკვეთაში ეხმარებოდა. კუპატა ზებრაზე ჩერდებოდა, აჩერებდა ავტომობილებს და მხოლოდ ამის შემდეგ აძლევდა ბავშვებს ქუჩის გადაკვეთის საშუალებას. მისი ეს ქცევა სოციალურ ქსელებში ფართოდ გავრცელდა და კუპატა ჰუმანური დამოკიდებულების სიმბოლოდ იქცა. მაშინ, მის შესახებ მსოფლიო მედია აქტიურად წერდა.
