მიუსაფარი ცხოველებისთვის თავშესაფრის მშენებლობის დაწყების საკითხი ამ დრომდე გაურკვეველია. ბათუმის მერმა AJARATIMES.GE-ის კითხვებს კონკრეტული პასუხი არ გასცა და ჩვეული რიტორიკით, კვლავ სამომავლო გეგმებსა და უკვე გავლილ პროცედურულ ეტაპებზე გაამახვილა ყურადღება, რაც საზოგადოებისთვის ისედაც ცნობილია.
რატომ ვერ შეასრულა არჩილ ჩიქოვანმა თითქმის სამი წლის წინ დადებული წინასაარჩენო დაპირება ამ დრომდე? გარემოებას ბათუმის მერი ტენდერში გამარჯვებული კომპანიების ნაკლები პასუხისმგებლობით ხსნის. ჩიქოვანი არ გამორიცხავს, რომ სამომავლოდ ტენდერისა და პროექტის მოთხოვნები დაკორექტირდეს, თუმცა ის თავშესაფრის მშენებლობის დაწყებისა და დასრულების ეტაპებს მაინც ვერ აკონკრეტებს. ბათუმის მერი იმასაც არ გამორიცხავს, რომ შესაძლოა მიუსაფარი ცხოველების თავშესაფარი ჩაქვში აღარ აშენდეს.
“ტენდერში გამარჯვებულმა კომპანიამ სამწუხაროდ ვერ შეძლო ნაკისრი ვალდებულებების შესრულება. ხელახლა, არაერთხელ გამოვაცხადეთ ტენდერი, თუმცა ამ კუთხით დაინტერესება ნაკლებია. ყველა ადამიანის ინტერესს ვითვალისწინებთ, ამიტომ შერჩეული ადგილმდებარეობის გადახედვაც იგეგმება, შესაძლოა შეიცვალოს კიდეც ტერიტორია. ერთ-ერთი ვერსიით ზოოპარკისა და მიუსაფარი ცხოველების პროექტების შერწყმას ვგეგმავთ. მოკლედ, კიდევ ერთხელ გადავხედავთ და მოხდება პროექტის დაკორექტირება,” – უთხრა AJARATIMES.GE-ის არჩილ ჩიქოვანმა.
ინფორმაციისთვის, „კუპატას“ სახელობის თავშესაფრისა და იპოდრომის მშენებლობა ჩაქვში, ბოტანიკური ბაღის მიმდებარედ იგეგმებოდა. ბოლო ტენდერი, რომელიც ბათუმის მერიას ჰქონდა გამოცხადებული, არ შედგა. მასში მონაწილეობა არავინ მიიღო. სატენდერო თანხა 32 მილიონ 948 ათას 540 ლარს შეადგენდა.
