გუშინ ღამით, ხელვაჩაურის პოლიციის შენობასთან ადგილობრივებმა საპროტესტო აქცია გამართეს. აქციის მონაწილეების თქმით, რამდენიმე მოქალაქეს საქართველო-თურქეთის საზღვრის კვეთის შესაძლებლობა არ მიეცა. განმარტავენ, რომ საზღვარზე მიზეზი არ აუხსნეს და უთხრეს, პასუხებისთვის ხელვაჩაურის პოლიციისთვის მიემართათ.
შეკრებილების განცხადებით, ისინი რეალურად მეგობრების მიმართ სოლიდარობის გამოხატვის გამო ისჯებიან – იმ პირების გამო, რომლებიც სხვადასხვა ბრალდებით არიან დაკავებული. მათი თქმით, საზღვრის კვეთაზე უარის თქმა სწორედ ამ პროტესტს უკავშირდება.
აქციის მონაწილეები არ გამორიცხავენ, რომ პროტესტის გამო შესაძლოა მათ წინააღმდეგ პროვოკაციები მოეწყოს. როგორც ისინი აცხადებენ, აქვთ მოლოდინი, რომ შესაძლოა ნარკოტიკული საშუალებების ან ცეცხლსასროლი იარაღის „ჩადების“ მცდელობაც კი განხორციელდეს, რასაც ისინი პოლიციის მხრიდან არსებულ პრაქტიკად აფასებენ.
