საქართველოს საავტომობილო გზების დეპარტამენტის თანამშრომლები 29-31 მაისს ბათუმში, ხუთვარსკლავიან სასტუმროში „კარგი მუშაობისთვის“ დაისვენებენ, შეხვედრას გამართავენ და ბიუჯეტის ხარჯზე სუფრასაც გაშლიან.
მინისტრის, მისი მოადგილეებისა და სხვა ოფიციალური პირების „ლაქშერულ ცხოვრებაში“ კი ჩვენ, სახელმწიფო ბიუჯეტში თანხის გადამხდელი მოქალაქეები, 17 700 ლარს გადავიხდით. თანხა გამარტივებული შესყიდვის ფარგლებში გაიხარჯება.
„მოგახსენებთ, რომ მიმდინარე წლის 29-31 მაისს, ბათუმში, სასტუმრო ,,Hilton Batumi’’-ში, საქართველოს საავტომობილო გზების დეპარტამენტის (შემდგომში – ,,დეპარტამენტი’’) ორგანიზებით დაგეგმილია დეპარტამენტის მიერ განხორციელებული პროექტების შეჯამება, ასევე გამოწვევების განსაზღვრა და სამომავლო გეგმებისა და მიზნების დასახვა. აღნიშნულ შეხვედრას დაესწრებიან მინისტრი, მინისტრის მოადგილეები, სამინისტროს სხვა ხელმძღვანელი პირები, ასევე დეპარტამენტისა და დეპარტამენტის სტრუქტურული ერთეულების ხელმძღვანელები. შეხვედრის ფორმატი მოიცავს მოხსენებების წარდგენას, სამუშაო განხილვებსა და დისკუსიას მნიშვნელოვან საკითხებზე. აღნიშნული ღონისძიების ფარგლებში საჭიროა მიმდინარე წლის 29 და 30 მაისს სადილისა და 30 მაისს ლანჩის ორგანიზება, 100 პერსონაზე. გამომდინარე იქედან, რომ შეხვედრა იმართება სასტუმრო ,,Hilton Batumi’’-ში, დროისა და შეხვედრის ორგანიზების პროცესის ეფექტიანობის, ასევე ხარჯების დაზოგვის მიზნით უმჯობესია ლანჩისა და სადილების ორგანიზება განხორციელდეს ამავე სასტუმროში“, – ვკითხულობთ მოხსენებით ბარათში, რომელიც დეპარტამენტის თავმჯდომარე ლევან დარახველიძეს ამავე დეპარტამენტის ადმინისტრაციული სამსახურის უფროსმა ნათია ლომოურმა გაუგზავნა.
საავტომობილო გზების დეპარტამენტსა და შპს „ტურინვესტს“ შორის გაფორმებული ხელშეკრულება 2026 წლის 14 მაისით თარიღდება. როგორც დოკუმენტშია აღნიშნული, დეპარტამენტმა განხორციელებულ პროექტებსა და გამოწვევებზე უნდა იმსჯელოს.
