2023 წელს აჭარის უმაღლესს საბჭოში პეტიცია არ დარეგისტრირებულა, ამის შესახებ AJARATIMES.GE-ის მოქალაქეთა მომსახურების ცენტრში განუცხადეს. უმაღლესი საბჭოს თავმჯდომარემ გვითხრა, რომ სამომავლოდ აქტიურ კამპანიას აწარმოებენ, რათა ამ მიმართულებით მოქალაქეები გააქტიურდნენ.
“მომავალ წელს აქტიურად დავგეგმავთ კამპანიას. მოსახლეობასთან გაცილებით მეტი შეხვედრა გვექნება რომ იცოდნენ დანიშნულება პეტიციის ინსტიტუტის. რაოდენობრივი და ხარისხობრივი თვალსაზრისითაც უფრო ვიაქტიურებთ. დასაწყისში დიდი აქტივობა ალბათ იმითაც იყო განპირობებული, რომ აინტერესებდათ რა შედეგები მოჰყვებოდა. ყველა ის პეტიცია, რაც დარეგისტრირდა გასულ წელს, ხელშესახები შედეგები გვაქვს. რამდენიმე მათგანი ჩვენს კომპეტენციას სცილდებოდა, ამიტომ გადავამისამართეთ შესაბამის უწყებებში,” – ამბობს დავით გაბაიძე.
გასულ წელს რეგიონის საკანონმდებლო ორგანოში სულ 9 პეტიცია დარეგისტრირდა, მათგან ერთ-ერთი მოსწავლეების ჩართულობით. მოზარდები პეტიციის გზით პიროტექნიკის აკრძალვას ითხოვნდნენ. უმაღლესი საბჭოს თავმჯდომარის თქმით, ვინაიდან ახალგაზრდების პეტიცია საქართველოს პარლამენტის მიერ ინიცირებული საკანონმდებლო პაკეტის ანალოგი იყო საბჭომ გაერთიანების რეკომენდაცია გასცა.
“ჯერჯერობით პარლამენტს საბოლოო გადაწყვეტილება არ მიუღია, რიგი საკითხები და პროცედურებია გასავლელი,” – დასძენს დავით გაბაიძე ჩვენთან საუბრისას.
