საქსტატის მიერ გამოქვეყნებული მონაცემების მიხედვით, 2024 წელს საქართველოში მოქმედი საწარმოების 95.2 პროცენტს ჰქონდა წვდომა ინტერნეტთან. მიუხედავად იმისა, რომ ინტერნეტი თითქმის უნივერსალურად არის ხელმისაწვდომი ბიზნესისთვის, მხოლოდ მცირე ნაწილს – 13.9 პროცენტს – აქვს საკუთარი ვებგვერდი.
მონაცემების თანახმად, საწარმოთა 73.3 პროცენტი ინტერნეტთან კავშირის უზრუნველსაყოფად იყენებს ფიქსირებულ ტექნოლოგიებს, მათ შორის ოპტიკურ-ბოჭკოვანს (FTTH), საკაბელო ქსელსა და DSL კავშირებს (ADSL, SDSL, VDSL).
საინტერესოა, რომ საწარმოებში დასაქმებულთა მხოლოდ 26.8 პროცენტი იყენებს კომპანიის კუთვნილ პორტატულ მოწყობილობას – ლეპტოპს ან სმარტფონს – მხოლოდ საწარმოს მიზნებისთვის, რაც შესაძლოა ციფრული მუშაობის ფორმების დაბალ გავრცელებაზე მიუთითებდეს.
რაც შეეხება სოციალურ მედიას, სტატისტიკის მიხედვით, საწარმოთა 70.7 პროცენტი საერთოდ არ იყენებს სოციალურ პლატფორმებს. მათ შორის კი, ვინც იყენებს, უპირატესობა ენიჭება ისეთ პოპულარულ სოციალურ ქსელებს, როგორებიცაა Facebook და LinkedIn – მსგავსი ქსელების გამოყენება მხოლოდ 28.8 პროცენტზე მოდის.
