ბოლო ერთ კვირაში სამაუწყებლო კომპანია TV25 რამდენიმე დასაქმებულმა დატოვა, ახალი ამბების რედაქციის თითქმის სრულმა შემადგენლობამ.
მაუწყებელი დღეს, კიდევ ერთმა ჟურნალისტმა დატოვა, რომლის შესახებაც სალომე უსტალიშვილმა საჯაროდ განაცხადა.
უსტალიშვილი ერთადერთია, ვინც ტელეკომპანიას მწვავედ, ღიად აკრიტიკებს. საჯარო წერილში წერს, რომ გადაწყვეტილებას წინ მენეჯმენტთან მუდმივი უთანხმოება უძღვოდა.
“ხუთი წლის შემდეგ დავტოვე ადგილი, რომელიც ჩემი ცხოვრების ნაწილი იყო. ხუთი წლის წინ, როდესაც ტელევიზიაში მივედი, იყო გარემო, სადაც ძალიან ბევრი ადამიანი ვმუშაობდით. ბოლო პერიოდში კი, განსაკუთრებით კი მას შემდეგ, რაც საინფორმაციოს უფროსი იძულებული გახდა წასულიყო, თანამშრომები ერთი მეორეს მიყოლებით წავიდნენ ტელევიზიიდან.
დღეს, მეც მივიღე გადაწყვეტილება, რომ დავწერო განცხადება და დავტოვო დაკავებული პოზიცია. განცხადებაში ნათლად წერია, რომ გადაწყვეტილების მიღების მიზეზი იყო გაურკვეველი პოლიტიკა, არაჯანსაღი და დამამცირებელი გარემო.
გული მტკივა იმ გარემოს გამო, რაც ახლა ტელევიზიაშია. მე მაინც, უზომოდ მიყვარს ჩემი წილი ,,TV25”. აქვე საჯაროდ ვიტყვი, რომ თანამდებობები დროებითია და ადამიანური სახე არუნდა დავკარგოთ.
…და ბოლოს მაინც ვიტოვებ იმედს, რომ
სრულყოფილად არ შეიცვლის პოლიტიკას ის ტელევიზია, სადაც მუდმივად ისმოდა ხალხის ხმა,”- წერს სალომე უსტალიშვილი სოციალურ ქსელში.
ტელეკომპანიიდან წავლის შესახებ განცხადება კიდევ ერთმა თანამშრომელმა დაწერა. თინათინ სასანიამ გადაწყვეტილება ასე ახსნა:
“გასრულდა მათი ამბავი ვითა სიზმარი ღამისა” ჩემი ცხოვრების მთავარი, რაც გამაჩნდა ყველაზე შეუფასებელი და ღირებული დრო (6 წელი) ტელევიზიაში მუშაობას დავუთმე…
კარიერული წინსვლისთვის, ზრდისთვისა და განვითარებისთვის როგორც სხვები მეც თავდაუზოგავად ვშრომობდი… ვსწავლობდით და ვასწავლიდით სხვებს, იმ მცირედსაც რაც კი გაგვაჩნდა. ფეხდაფეხ მივსდევდით ყველა სიახლეს და გამოწვევას.
ყველაზე მნიშვნელოვანი გუნდისთვის იყო სწორი და ჯანსაღი ინფორმაციის მიწოდება ჩვენი მაყურებლისთვის.
ვმუშაობდით იმისთვის, რომ არხს არ დაეკარგა ხალხის ნდობა და TV25 ყოფილიყო მათვის ადგილი, სადაც მათი ხმა ყოველთვის იქნებოდა მთავარი.
1 მაის დავტოვე დაკავებული თანამდებობა(ები) დიდი ფიქრისა და გაანალიზების შემდეგ. დავტოვე ადგილი სადაც სახლზე მეტ დროს ვატარებდი.
არც ჩემი წამოსვლა იყო მარტივი, იყო ცრემლები გულდაწყვეტა. იმედგაცრუება უსამართლობის განცდა და დაუფასებლობის მოზღვავებული გრძნობა. ხო და ავდექი და წამოვედი …
რას გისურვებთ…? ჯანსაღი პოლიტიკის შენარჩუნებას!!! არ დაკარგოთ ადამიანური სახე. გახსოვდეთ.. სკამმა არ უნდა გიცვალოს იერი,”- დაწერა თინათინ სასანიამ სოციალურ ქსელში.
ცნობისთვის: ტელევიზიიდან თანამშრომელთა გადინებას წინ გადაცემების დახურვის ფაქტი უძღვოდა. ხუთ თვეზე მეტია ეთერში არ გადის დღის საინფორმაციო გამოშვებები. საერთოდ დაიხურა არხის ერთადერთი პოლიტიკური თოქ-შოუ “პოზიცია” და სხვა გასართობი პროგრამა.
ინფორმაციისთვის: ბოლო 7 წელში, მაუწყებლის თანამშრომელთა რაოდენობა 45-დან 13-მდე შემცირდა. TV25 აჭარაში 30 წელზე მეტია მაუწყებლობს.
“აჭარა თაიმსი” კომენტარისთვის არხის დირექტორს დაუკავშირდა, რომელმაც განმატებებზე უარი განაცხადა.
