ბათუმში საპროტესტო აქციები კვლავ გრძელდება, და ეს უკვე პროტესტის 42-ე დღეა. ხანგრძლივი პროტესტის ფონზე, ასობით ადამიანი კვლავ ქუჩაშია გამოსული და მათი მოთხოვნები უცვლელია – რეჟიმის პატიმრების გათავისუფლება და ხელახალი არჩევნები. აქციის მონაწილეებმა ბათუმის სხვადასხვა ქუჩა ფეხით მოიარეს.
მიმდინარე პროტესტის ფარგლებში, დღეს, განსაკუთრებით გამორჩეული იყო ზვიად ცეცხლაძის მამა, რომელმაც სიტყვით მიმართა დემონსტრანტებს. მისი თქმით, დიქტატორული რეჟიმი უკვე ბოლო ეტაპზეა და ამჯერად არც ერთ მოქალაქეს არ დაზოგავს.
„ვინც დღეს სახლებში ვსხედვართ და არ ვუერთდებით პროტესტს, იცოდეთ, დიქტატორული რეჟიმი, რომელიც ყალიბდება და ფაქტობრივად ბოლო ეტაპზეა მისული, არავის არ დატოვებს, ყველას შეეხება. ყველას ოჯახში მოვა. ის კანონმდებლობა, რასაც იღებენ დღეს, იცოდეთ, ყველას სახლში, ყველას ბიზნესში, ყველას მაღაზიაში მოვა, ყველას ოჯახში შემოგიხედავთ. თქვენი ბავშვებიც აღმოჩნდებიან ციხეებში. ვიდრე ჩვენი შვილები არიან და არა თქვენი შვილები, ყველა გამოდით და დადექით ამ ხალხის გვერდით. დაგვიანებული იქნება, იცოდეთ, დაგვიანებული იქნება, დაგვიანებული იქნება ისე, რომ მერე აღარაფერი აღარ უშველის და მივიღებთ ქვეყანას რუსეთისაკენ, ახალგაზრდებს, რომლებსაც ტვინი უმუშავებთ – გაქცეულს ქვეყნიდან და დარჩებიან მონური ფსიქოლოგიის ადამიანები მხოლოდ, რომლებიც სკამებისთვის, ფულისთვის და კომფორტისთვის იბრძვიან,” – განაცხადა ზვიად ცეცხლაძის მამამ, ზურაბ ცეცხლაძემ აქციაზე სიტყვით გამოსვლისას.
https://www.facebook.com/ajaratimes/videos/1106013617939253/
