“უპირობო მხარდაჭერა,” – აღნიშნეს “ქართული ოცნების” დეპუტატებმა საკრებულოს სხდომაზე და საკითხს მხარი ერთხმად დაუჭირეს, განხილვისა და კითხვების გარეშე. ამ გადაწყვეტილებით, მერს, ლევან ზოიძეს შესაძლებლობა მიეცა ბათუმისა და ლაზეთის მიტროპოლიტის მოთხოვნა უპირობოდ დააკმაყოფილოს.
“მიზანშეწონილად იქნა მიჩნეული ბათუმისა და ლაზეთის მიტროპოლიტის, მეუფე დიმიტრის თხოვნის დაკმაყოფილება და სამოციქულო ავტოკეფალური მართმადიდებლური ეკლესიისთვის უსასყიდლოდ, აღნაგობის უფლებით, 99 წლით სოფელ კვირიკეში 580 კვ. მეტრი მიწის გადაცემა შემდგომში ტაძრის მშენებლობის მიზნით,” – წერია ქობულეთის მერიის მიერ საკრებულოსთვის გაგზანილ წერილში.
580 კვადრატული მეტრი მიწის ნაკვეთის 99 წლით დომინანტური რელიგიისთვის გადაცემის საკითხს მხარი საკრებულოს ოპოზიციონერმა დეპუტატმაც დაუჭირა. პარტია “საქართველოსთვის” წევრი, ია მესხიძე ამბობს, რომ ხელისუფლებასთან მოსახლეობის მოთხოვნის საფუძველზე ითანამშრომლა, ამასთან ეკლესიის მშენებლობის მომხრე თავადაცაა.
“აღნიშნული საკითხი უშუალოდ სოფელ კვირიკეს მოსახლეობიდან მოდიოდა. მოსახლეობამ მიწის ეკლესიისთვის გადაცემა ითხოვა ჩვენთან შეხვედრისას. ჩვენ ვითანამშრომლეთ ხელისუფლებასთან და მხარი დავუჭირეთ ქობულეთის მერიის მიერ წარდგენილ საკითხს. მხარს იმას ვუჭერ, რომ სოფელში არსებობდეს მართმადიდებლური ტაძარი, სადაც მოსახლეობას შეეძლება აღასრულოს რელიგიური მსახურება და ჰყავდეს მოძღვარი ახლოს. ვფიქრობ რელიგია ხელს შეუწყობს მოსახლეობის სულიერ ზრდას, მორწმუნე ადამიანი ბევრად უფრო კეთილია,” – თქვა ჩვენთან საუბრისას ია მესხიძემ, რომელსაც ასევე, სხვა რელიგიური კომპენსიების მიმართ სახელმწიფოს დისკრიმინაციული პოლიტიკა შევახსენეთ, თუმცა მან კითხვას პასუხი არ გასცა.
რატომ ჩააყენა ქობულეთის საკრებულომ და მერიამ მართმადიდებელი ეკლესია უპირატეს შემთხვევაში და როგორი პოზიცია ექნება მუნიციპალიტეტს სხვა კომპენსიების მიმართვის შემთხვევაში? კითხვას საკრებულოს თავმჯდომარემ არ უპასუხა. დავით მჭედლიშვილი შეეცადა დავერწმუნებინეთ, რომ სხვა რელიგიის წამომადგენლებსაც ეხმარებიან, თუმცა მან კონკრეტული ფაქტი ვერ დაგვისახელა. “აჭარა თაიმსის” ყველა კითხვას მჭედლიშვილი ზოგადად ან საერთოდ არ პასუხობდა.
“ფაქტიურად ყველა დეპუტატმა, ვინც ესწრებოდა სხდომას ერთხმად დაუჭირა საკითხს მხარი. მიზნობრიობა არის ის, რომ მოსახლეობისგან რა საკითხებიც შემოდის ყველა მათგანს განვიხილავთ. ეს მოხდა ძალიან გამჭვირვალედ, დემოკრატიულ ვითარებაში, ყველა დეპუტატს ჰქონდა საკუთარი აზრის გამოხატვის უფლება. მე პირადად ვთვლი, რომ საქართველო მართმადიდებლური ქვეყანაა, შესაბამისად აღნიშნულ ტერიტორიაზე ეკლესია აშენდება, ამ რელიგიას ბევრი მიმდევარი ჰყავს და მოსახლეობის სურვილიც ეს იყო,” – თქვა ჩვენთან საუბრისას დავით მჭედლიშვილმა, რომელმაც არ დააკონკრეტა რა პოზიცია ექნება მას, იმ შემთხვევაში თუ სხვა კომპენსიის წამომადგენლებიც მოითხოვენ მუნიციპალიტეტისგან მიწის უსასყიდლოდ გადაცემას.
ინფორმაციისთვის: სხვადასხვა კომპენსიის წარმომადგენლები წლებია ხელისუფლების მხრიდან ჩაგვრა, დისკრიმინაციასა და არასამართლიან მიდგომაზე საუბრობენ. მესამე სექტორი თავის კვლევებში მუდმივად აღნიშნავს, რომ სახელმწიფო გულუხვი მხოლოდ მართმადიდებელი ეკლესიის მიმართაა, რომელსაც ისედაც რამდენიმემილიონიანი დაფინანსება აქვს.
