ირაკლი კობახიძის განცხადებით, 6 წელზე მეტი ხნის ავტომობილების ქვეყანაში შემოყვანის აკრძალვა გაუქმდება, თუმცა ამავე დროს მნიშვნელოვნად გაიზრდება მათი განბაჟების ტარიფი. მისი თქმით, ახალი რეგულაციის მიხედვით, 6 წელზე მეტი ხნის ავტომობილებისთვის აქციზის განაკვეთი 1 კუბურ სანტიმეტრზე 4.5 ლარი იქნება.
» ბათუმში 5 მილიონი ევროს ღირებულების ავტომობილების უკანონო შემოტანის მცდელობა გამოავლინეს
ამ დრომდე მოქმედი წესით, 6-დან 9 წლამდე ავტომობილის განბაჟების ტარიფი 1 კუბურ სანტიმეტრზე 80 თეთრს შეადგენდა, ხოლო ასაკის ზრდასთან ერთად გადასახადი ყოველწლიურად 10-30 თეთრით იმატებდა და მაქსიმუმ 2.4 ლარს აღწევდა.
რაც შეეხება მარჯვენასაჭიან ავტომობილებს, მათთვის აქციზის განაკვეთი სამმაგი ოდენობით იყო განსაზღვრული. კობახიძის მიერ დაანონსებული ცვლილების მიხედვით, 6 წელზე მეტი ხნის ავტომობილების შემოყვანის შემთხვევაში აქციზის გადასახადი დაახლოებით 200-500 პროცენტით გაიზრდება.
» ქრთამის აღების სქემა სარფის საბაჟოზე – თურქეთში 600 მილიონის ღირებულების ავტომობილები ამოიღეს
განბაჟების ღირებულება ძრავის მოცულობაზე იქნება დამოკიდებული. მაგალითად, 1.5-ლიტრიანი ძრავის მქონე ავტომობილის განბაჟება დაახლოებით 6 750 ლარი დაჯდება (1500 კუბური სანტიმეტრი X 4.5 ლარი). 2.0-ლიტრიანი ძრავის შემთხვევაში თანხა დაახლოებით 9 000 ლარი იქნება, ხოლო 3.0-ლიტრიანი ძრავის მქონე ავტომობილის – დაახლოებით 13 500 ლარი.
აღსანიშნავია, რომ 6 წლამდე ასაკის ავტომობილების შემთხვევაში განბაჟების ტარიფი მნიშვნელოვნად დაბალია და 1 კუბურ სანტიმეტრზე დაახლოებით 1-დან 1.5 ლარამდე მერყეობს.
