შინაგან საქმეთა სამინისტროს ინფორმაციით, ტრეფიკინგის ბრალდებით დააკავეს 1993 წელს დაბადებული მ.ფ., რომელიც წარსულში სხვადასხვა დანაშაულისთვის არის ნასამართლევი. გამოძიება ცხადყოფს, რომ ბრალდებული 1963 წელს დაბადებულ ლ.ქ.-ს სხვადასხვა პირთან სქესობრივ კავშირში იძულებით ამყოფებდა.
შსს-ს ცნობით, გამოძიების ფარგლებში ჩატარდა ინტენსიური საგამოძიებო მოქმედებები, მათ შორის მოსამართლის განჩინების საფუძველზე განხორციელებული ფარული საგამოძიებო მოქმედებები. მიღებული მტკიცებულებების თანახმად, მ.ფ. ფსიქოლოგიური ძალადობისა და მუქარის გამოყენებით, ფინანსური სარგებლის მიღების მიზნით, დაზარალებულს აიძულებდა სქესობრივ კავშირებს, ხოლო ამ გზით მიღებული შემოსავლის ნაწილს თავად ითვისებდა.
ბრალდებულს ბრალდება წარედგინა საქართველოს სისხლის სამართლის კოდექსის 143-ე პრიმა მუხლის პირველი ნაწილით, რაც ადამიანით ვაჭრობას (ტრეფიკინგს) გულისხმობს და სასჯელის სახით 12 წლამდე თავისუფლების აღკვეთას ითვალისწინებს. შინაგან საქმეთა სამინისტროს განცხადებით, გამოძიება გრძელდება.
