„ქართული ოცნების“ სახელმწიფო უსაფრთხოების სამსახური აცხადებს, რომ მაღალი საზოგადოებრივი ინტერესიდან გამომდინარე ავრცელებს 17 ოქტომბერს ჩატარებული მასშტაბური ოპერაციის ამსახველ კადრებს. უწყების ცნობით, ჩატარდა ჩხრეკები ყოფილი და მოქმედი მაღალი თანამდებობის პირების საცხოვრებელ სახლებში.
სუს-ის ინფორმაციით, 17 ოქტომბერს, დილის 10:00 საათიდან, ჩხრეკა ჩატარდა თბილისში, დედოფლისწყაროში, ვანში, ჩოხატაურსა და ბორჯომში მდებარე 24 ბინასა და საცხოვრებელ სახლში, ასევე განხორციელდა პირადი ჩხრეკები. ღონისძიებაში მონაწილეობდა საქართველოს პროკურატურისა და სახელმწიფო უსაფრთხოების სამსახურის 230-მდე თანამშრომელი.
ჩხრეკები შეეხო – ირაკლი ღარიბაშვილს, გრიგოლ ლილუაშვილს, ოთარ ფარცხალაძეს, რომეო მიქაუტაძეს, მიხეილ ჩოხელს, ვანო და თორნიკე პარკაულებს, ანდრია (სანდრო) ლილუაშვილს და მათ ოჯახებს.
ოპერაციის შედეგად ამოღებულია 7 002 200 აშშ დოლარი და 136 000 ლარი ნაღდი ფული, 198 ერთეული ძვირფასი ნაკეთობა და საათი, ძვირადღირებული ნახატები, ათასობით ფურცლისგან შემდგარი დოკუმენტაცია, 50 მობილური ტელეფონი და 119 ელექტრონული მოწყობილობა.
სუს-ის ცნობით, ამჟამად სახელმწიფო უსაფრთხოების სამსახურისა და საქართველოს გენერალური პროკურატურის საგამოძიებო ნაწილები ერთობლივად სწავლობენ ამოღებულ დოკუმენტაციასა და ტექნიკურ მოწყობილობებში არსებულ ინფორმაციას, ასევე ამოღებული ფულის წარმომავლობას. უწყების განცხადებით, მიღებული მონაცემების საფუძველზე დაიგეგმება დამატებითი საგამოძიებო და ოპერატიული მოქმედებები და შესაბამისი სამართლებრივი რეაგირება.
