საქართველოს პროკურატურამ პირადი მიმოწერის საიდუმლოების დარღვევისა და კომპიუტერული მონაცემების უკანონო გამოყენების ფაქტებზე ერთი პირი დააკავა.
დასავლეთ საქართველოს საოლქო პროკურატურის საგამოძიებო სამმართველოს მიერ ჩატარებული გამოძიებით დადგინდა, რომ დაკავებულმა, ეჭვიანობის ნიადაგზე, მოტყუებით მოიპოვა დაზარალებულის სოციალური ქსელის Facebook-ის პაროლის აღსადგენი კოდი და უკანონოდ შეაღწია მის პირად პროფილზე.
შედეგად, მან დაზარალებულის პირად მიმოწერას მესამე პირთან გაეცნო, რითაც დაარღვია პირადი ცხოვრების საიდუმლოება.
ბრალდებულს წარედგინა ბრალდება საქართველოს სისხლის სამართლის კოდექსის 159-ე მუხლის პირველი ნაწილით პირადი მიმოწერის საიდუმლოების დარღვევისთვის, და 285-ე მუხლის პირველი ნაწილით – კომპიუტერული მონაცემის უკანონოდ გამოყენებისთვის.
დანაშაულები ჯამურად 3 წლამდე თავისუფლების აღკვეთას ითვალისწინებს.
პროკურატურა სასამართლოს კანონით დადგენილ ვადაში მიმართავს ბრალდებულის მიმართ აღკვეთის ღონისძიების გამოყენების შუამდგომლობით.
