შინაგან საქმეთა სამინისტროს ინფორმაციით, მიგრაციის დეპარტამენტისა და სასაზღვრო პოლიციის თანამშრომლებმა ერთობლივი კომპლექსური ღონისძიებების შედეგად, საქართველოში არალეგალურად მცხოვრები უცხო ქვეყნის 5 მოქალაქე – ინდოეთის, პაკისტანის, ნიგერიისა და ნეპალის მოქალაქეები დააკავეს.
მიგრაციის დეპარტამენტის ცნობით, გამოძიებით დადგინდა, რომ აღნიშნული პირები საქართველოში იმყოფებოდნენ „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ კანონის მოთხოვნათა დარღვევით და წლების განმავლობაში ბოროტად სარგებლობდნენ თავშესაფრის პროცედურით გათვალისწინებული ვადებით.
უწყების განმარტებით, დაკავებულებმა არ ისარგებლეს ნებაყოფლობითი გაძევების ვადით, რის შემდეგაც მიგრაციის დეპარტამენტმა მათი დაკავების შესახებ გადაწყვეტილება მიიღო.
ამ დროისთვის უცხო ქვეყნის მოქალაქეები მოთავსებული არიან დროებითი განთავსების ცენტრში, საიდანაც ისინი უახლოეს პერიოდში დაბრუნდებიან საკუთარ ქვეყნებში.
