ქართველი მეზღვაური დავით ფანცულაია სოციალურ ქსელში ხმელთაშუა ზღვაში ჩატარებული სამაშველო ოპერაციის შესახებ წერს. მისი ინფორმაციით, გემის ეკიპაჟმა 36 მიგრანტი გადაარჩინა, რომლებიც ოთხი დღის განმავლობაში ზღვაში დახმარების გარეშე იმყოფებოდნენ.
ფანცულაიას თქმით, მიგრანტები, მათ შორის 20 წლის ფეხმძიმე ქალი სამხრეთ სუდანიდან, ევროპაში მოხვედრას ცდილობდნენ, თუმცა მათი კატარღა ხმელთაშუა ზღვის შუაგულში გაფუჭდა.
„36 ადამიანმა, მათ შორის ერთი 20 წლის ფეხმძიმე გოგონა სამხრეთ სუდანიდან, რომლებიც მიგრანტებად ევროპაში მოხვედრას ცდილობდნენ, ოთხი დღე უწყლოდ და უპუროდ გაატარეს, რადგან მათი კატარღა ხმელთაშუა ზღვის შუაგულში გაფუჭდა. როგორც თავად ამბობენ, 22-მა გემმა მათ გვერდი აუარა. არავის გასჩენია სურვილი, ისინი გადაერჩინათ. დღეს კი მე და ჩემმა გემმა მათ სიცოცხლის იმედი დავუბრუნეთ. ამაყად ვიტყვი, რომ სამაშველო ოპერაციას მე ვხელმძღვანელობდი. სწორედ მე მივუახლოვდი მათ გემის სამაშველო კატარღით, ჩავაბით დაზიანებული კატარღა და უსაფრთხოდ მივიყვანეთ ჩვენს გემამდე“, – წერს დავით ფანცულაია სოციალურ ქსელში.
