დამოუკიდებელი ონლაინმედიების ერთობა „სინათლე მედია“ „ქართული ოცნებისა“ და მასთან დაკავშირებული პროპაგანდისტული არხების მხრიდან განხორციელებულ მასშტაბურ დისკრედიტაციის კამპანიას ერთიანი განცხადებით ეხმიანება.
ჟურნალისტების შეფასებით, ბოლო პერიოდში გაძლიერებული შეტევები ყოველგვარ კანონიერ და ეთიკურ ზღვარს სცდება და მიზნად დამოუკიდებელი მედიის ჩახშობას ისახავს.
განცხადებაში აღნიშნულია, რომ თავისუფალი, პროფესიულ სტანდარტებზე მომუშავე ჟურნალისტებისთვის საქართველოს პოლიტიკური გარემო წლების განმავლობაში არასოდეს ყოფილა მარტივი, თუმცა ახლანდელი ვითარება „ქართული ოცნების“ მმართველობის პირობებში განსაკუთრებით მძიმეა.
მათი თქმით, პროპაგანდისტული საინფორმაციო საშუალება „იმედი“ დამოუკიდებელ ონლაინგამოცემებს „აგენტებად“ და „ანტიქართულ ძალად“ წარმოაჩენს, რაც აშკარა სიცრუესა და შეთითხნილ ბრალდებებზეა აგებული. ერთობის განცხადებით, მიზანმიმართული შეტევა იმ მედიებს ეხება, რომელთა პროფესიონალიზმი და სანდოობა აქამდე არასდროს გაჩენილა ეჭქვეშ.
ჟურნალისტები აღნიშნავენ, რომ „ოცნების“ გაღიზიანებას იწვევს კრიტიკული კითხვები, რომლებიც საზოგადოებრივად მნიშვნელოვან თემებს – მათ შორის კომპანია Eagle Hills-ის პროექტსა და უმაღლესი განათლების რეფორმას უკავშირდება. დამოუკიდებელი მედიის შეფასებით, მმართველ პარტიას არ სურს, რომ ქვეყანაში მიმდინარე პროცესები, უწყვეტი პროტესტი, პოლიტიკური კრიზისი, კორუფციული სკანდალები, სოციალური პრობლემები და ადამიანის უფლებების დარღვევის ფაქტები სათანადოდ იქნეს გაშუქებული.
ერთობა ხაზს უსვამს, რომ საზოგადოებრივი მხარდაჭერა სწორედ ამ ვითარებაში იქცა მათ სამიზნედ. სამთვიანი კამპანიის ფარგლებში, 22-მა ონლაინმედიამ მოქალაქეებისგან ჯამში თითქმის 100 ათასი ლარის დონაცია მიიღო, რაც ოფისებისა და ტექნიკური რესურსების შესანარჩუნებლად დაიხარჯა.
„სინათლე მედია“ ერთიანი განცხადებით მიმართავს თვითრეგულირების ორგანოს და მოითხოვს „იმედის“ სიუჟეტში გავრცელებული ცრუ ინფორმაციის უარყოფას. ასევე ითხოვენ პირდაპირ ეთერს, რათა საზოგადოებას თავად მიაწოდონ პასუხები „აბსურდულ და ურთიერთგამომრიცხავ ბრალდებებზე“.
„ჩვენ, თავისუფალი ჟურნალისტები, ვდგავართ ერთად და განვაგრძობთ პროფესიული მოვალეობის კეთილსინდისიერად შესრულებას, რათა საზოგადოებას ჰქონდეს ინფორმირებული გადაწყვეტილებების მიღების უფლება,“ – ნათქვამია ერთობლივ განცხადებაში.
