ქობულეთში თევზები დაიხოცა – არხში მანდარინის ნარჩენები ჩაყარეს

ქობულეთში, რუსთაველის ქუჩის გასწვრივ არსებულ ე.წ. სმეკალოვკის არხში თევზები დაიხოცა, ამის შესახებ ინფორმაცია ajaratimes.ge-ის ადგილობრივებმა აცნობეს და ფაქტის ამსახველი ფოტოები მიაწოდეს. მათი ინფორმაციით, არხში, საწარმოდან გადამუშავებული მანდარინის ნარჩენები ჩაღვარეს. დახოცილი თევზები წყლის ზედაპირზეა, რის გამოც ტერიტორიაზე უსიამოვნო სუნია გავრცელებული.

“ქართული ინდუსტრიული აქტივების მართვის ჯგუფი” საწარმოს წლებია გამწმენდი ნაგებობის გარეშე ამუშავებს, გადამუშავებული ციტრუსის ნარჩენებს კი პირდაპირ ღია არხში უშვებს. ორგანიზაცია ფერმერებისგან ციტრუსს იბარებს, რომლის სუბსიდირებასაც ადგილობრივი ხელისუფლება ახდენს.

ajaratimes.ge-მ ფაქტის შესახებ გარემოსდაცვითი ზედამხედველობის სამსახურს აცნობა.

ajaratimes.ge-ის სატელეფონო ზარებს “ქართული ინდუსტრიული აქტივების მართვის ჯგუფში” არ უპასუხეს.