ბათუმში, გოროდოკის დასახლებაში ახალი ხიდის მშენებლობა, რომელიც თებერვალში უნდა დასრულებულიყო, ამ დრომდე არ დაწყებულა. ძველი ავარიული ხიდი გასული წლის მაისში ჩაკეტეს და მას შემდეგ ადგილობრივებს გადაადგილება შემოვლითი გზით უწევთ.
გოროდოკი მჭიდროდ დასახლებული უბანია, სადაც ალტერნატიული გზა ძირითად მარშრუტთან შედარებით მოშორებით მდებარეობს. მოსახლეობის თქმით, შემოვლითი გზის გამო ტაქსები დასახლებაში შესვლას ერიდებიან, ხოლო სასწრაფო სამედიცინო დახმარებისა და სახანძრო-სამაშველო სამსახურის ეკიპაჟებს ადგილზე მისასვლელად მეტი დრო სჭირდებათ.
ადგილობრივები აცხადებენ, რომ ხიდის ჩაკეტვის დღეს ადგილზე მერიის წარმომადგენლები იმყოფებოდნენ, გადაიღეს ფოტოები, თუმცა მას შემდეგ ტერიტორიაზე მძიმე ტექნიკა არ გამოჩენილა. შექმნილ ვითარებას მოსახლეობის ნაწილი ხელისუფლების უპასუხისმგებლობას უკავშირებს.
„ქართული ოცნების“ ბათუმის მერიაში ამტკიცებენ, რომ სამუშაოების დაწყება ობიექტური მიზეზით შეფერხდა. უწყების ინფორმაციით, ხიდის ორივე მხარეს გადის ბუნებრივი აირის მილი, რომელიც მაღალმთიანი აჭარისა და ქალაქის ნაწილის ბუნებრივი აირით მომარაგებას უზრუნველყოფს. აღნიშნული მილსადენის გადატანა ზამთრის სეზონის გამო ამ ეტაპზე შეუძლებელია.
მერიის განცხადებით, კომპანია „სოკარ ჯორჯიადან“ მიღებული ოფიციალური წერილის თანახმად, მილსადენის გადატანის სამუშაოები გაზაფხულზე დაიგეგმება. მხოლოდ ამ პროცესის დასრულების შემდეგ გახდება შესაძლებელი ხიდის სამშენებლო სამუშაოების დაწყება.
