საქსტატის კვლევის თანახმად, 2026 წლის თებერვალში საქართველოში წლიურმა ინფლაციამ 4.6 პროცენტი შეადგინა. მიუხედავად იმისა, რომ თვიური ინფლაცია მხოლოდ 0.2 პროცენტი იყო, წლიურ ჭრილში ფასების ზრდა განსაკუთრებით სურსათისა და მომსახურების რიგ მიმართულებებში გამოიკვეთა.
ყველაზე დიდი ზრდა დაფიქსირდა სურსათისა და უალკოჰოლო სასმელების ჯგუფში – ფასები 9.5 პროცენტით გაიზარდა, რაც მთლიან ინფლაციაში 3.2 პროცენტული პუნქტით აისახა.
კატეგორიების მიხედვით, განსაკუთრებით გაძვირდა:
- თევზეული – 23.1%;
- პური და პურპროდუქტები – 13.8%;
- ხილი და ყურძენი – 13.3%;
- ბოსტნეული და ბაღჩეული – 10.2%;
- ხორცი და ხორცპროდუქტები – 9.6%;
- შაქარი და ტკბილეული – 9.4%;
- ზეთი და ცხიმი – 7.1%.
სურსათის გაძვირება წლიური ინფლაციის მთავარი მამოძრავებელი ფაქტორია.
მნიშვნელოვანი ზრდა ფიქსირდება სხვადასხვა საქონელსა და მომსახურებაში – 9.8%. განსაკუთრებით მაღალია:
- პირადი ნივთები, სხვა კატეგორიებში ჩაურთველი – 57.8%;
- დაზღვევა – 8.5%;
- პირადი ჰიგიენა – 4.5%.
ჯანმრთელობის დაცვის ჯგუფში ფასები 5.9 პროცენტით გაიზარდა. გაძვირდა:
- სამედიცინო პროდუქცია და აპარატურა – 8.1%;
- ამბულატორიული მომსახურება – 5.6%;
- საავადმყოფოების მომსახურება – 1.7%.
ასევე გაიზარდა ალკოჰოლური სასმელებისა და თამბაქოს ფასები – 4.3%. თამბაქო 7.1 პროცენტით გაძვირდა, ალკოჰოლური სასმელები – 1.4 პროცენტით.
თებერვალში, წინა თვესთან შედარებით, განსაკუთრებით გაძვირდა:
- სატრანსპორტო მომსახურება – 5.5%;
- პირადი ნივთები – 17.9%;
- ალკოჰოლური სასმელები – 2.2%.
მიუხედავად იმისა, რომ თვიურად სურსათის ნაწილში გარკვეული შემცირებაც დაფიქსირდა, წლიურ ჭრილში ძირითადი მოხმარების პროდუქტებზე ფასების ზრდა კვლავ მკვეთრად გამოიკვეთა.
