არასამთავრობო ორგანიზაციები აცხადებენ, რომ ბათუმის მერიაში ჩატარებული რეორგანიზაცია, რომლის შედეგადაც 21 თანამშრომელი სამსახურიდან გათავისუფლდა, შესაძლოა განსხვავებული პოლიტიკური პოზიციის მქონე საჯარო მოხელეების სისტემიდან ჩამოშორებას ემსახურებოდეს.
განცხადებას ავრცელებენ „სოციალური სამართლიანობის ცენტრი“ და „დამოუკიდებელი პროფესიული კავშირი – კონსტიტუციის 78-ე მუხლი“. მათი შეფასებით, 2024 წლის ნოემბრის შემდეგ საჯარო სექტორში მიმდინარე პროცესები მიუთითებს ხელისუფლების მცდელობაზე, საჯარო სამსახური პოლიტიკურ კონტროლს დაუქვემდებაროს.
» ბათუმის მერიაში საკადრო ცვლილებებია – მუნიციპალურ ორგანიზაციებს ახალი ხელმძღვანელები ჰყავთ
ორგანიზაციების ინფორმაციით, ბათუმის მერიაში რეორგანიზაცია 2026 წლის 9 იანვარს დაიწყო და შედეგად 21 თანამშრომელი გათავისუფლდა. მათი განცხადებით, გათავისუფლებულთა აბსოლუტური უმრავლესობა იმ პირთა კატეგორიას მიეკუთვნება, ვინც 2024 წელს ევროკავშირში საქართველოს ინტეგრაციის პროცესის შეჩერებას საჯაროდ გაემიჯნა და პროევროპულ პეტიციას მოაწერა ხელი.
მონაცემების მიხედვით, თავდაპირველად პეტიციას ხელი მოაწერა მერიის 28 თანამშრომელმა, თუმცა მოგვიანებით ორმა მათგანმა ხელმოწერა გაიწვია. საბოლოოდ, 26 ხელმომწერიდან 25-ს რეორგანიზაციის ფარგლებში დაკავებული შტატი გაუუქმდა, ხოლო 21 თანამშრომელი სამსახურიდან გათავისუფლდა. ამჟამად პეტიციის ხელმომწერებიდან სამსახური მხოლოდ სამ თანამშრომელს აქვს შენარჩუნებული.
ორგანიზაციების შეფასებით, რეორგანიზაციის პროცესში მერიის სტრუქტურაში რამდენიმე განყოფილება გაერთიანდა და შეიცვალა სპეციალისტების კატეგორიები, რის შედეგადაც გარკვეული პოზიციები გაუქმდა. მათი თქმით, შიდა კონკურსში პეტიციის ვერცერთმა ხელმომწერმა ვერ შეძლო შესაბამისი ბარიერის გადალახვა, მიუხედავად იმისა, რომ კონკურსის შედეგებში გამარჯვებულ კანდიდატებსა და სხვა მონაწილეებს შორის ქულათა სხვაობა უმნიშვნელო იყო.
არასამთავრობო ორგანიზაციები ყურადღებას ამახვილებენ იმ გარემოებაზეც, რომ რეორგანიზაციამდე ბათუმის მერიაში 162 შტატი არსებობდა, ხოლო რეორგანიზაციის შემდეგ მათი რაოდენობა 135-მდე შემცირდა. შედეგად გაუქმდა 27 შტატი, რაც თითქმის სრულად ემთხვევა პროევროპული პეტიციის ხელმომწერი თანამშრომლების რაოდენობას.
მათივე შეფასებით, აღნიშნული გარემოება აჩენს საფუძვლიან ეჭვს, რომ რეორგანიზაცია ადმინისტრაციული ოპტიმიზაციის მიზნით არ განხორციელებულა და შესაძლოა გამოყენებული ყოფილიყო განსხვავებული პოლიტიკური პოზიციის მქონე საჯარო მოხელეების სისტემიდან ჩამოსაშორებლად.
განცხადებაში ასევე აღნიშნულია, რომ 2024 წელს „საჯარო სამსახურის შესახებ“ კანონში შეტანილი ცვლილებებით რეორგანიზაციის საფუძვლები გაფართოვდა და საჯარო მოხელეთა უფლებრივი გარანტიები მნიშვნელოვნად შემცირდა, რამაც საჯარო დაწესებულებებში რეორგანიზაციის საფუძვლით გათავისუფლების პროცესი გაამარტივა.
ორგანიზაციების შეფასებით, ბათუმის მერიის თანამშრომლების გათავისუფლება შეიძლება შეფასდეს როგორც გამოხატვის თავისუფლებაში ჩარევა და პოლიტიკური ნიშნით დისკრიმინაცია, რაც წინააღმდეგობაში მოდის როგორც საქართველოს კანონმდებლობასთან, ასევე საერთაშორისო სამართლებრივ სტანდარტებთან.
