დაბა ხულოში სურსათის ეროვნული სააგენტოს ინსპექტორებმა ლიმონათის არალეგალური საწარმო გამოავლინეს. ინფორმაციას სურსათის ეროვნული სააგენტო ავრცელებს.
უწყების ცნობით, მცირე მეწარმე საქმიანობას ეკონომიკურ საქმიანობათა რეესტრში რეგისტრაციის გარეშე ახორციელებდა. გეგმური ინსპექტირებისას საწარმოში კრიტიკული შეუსაბამობები დაფიქსირდა, მათ შორის ჰიგიენური ნორმების დარღვევა, ინფრასტრუქტურის გაუმართაობა და სურსათის დაბინძურების საფრთხეები.
ინსპექტორებმა ასევე დაადგინეს, რომ დარღვეული იყო ლიმონათის ეტიკეტირების წესიც.
გამოვლენილი დარღვევების გამო ბიზნესოპერატორს საწარმოო პროცესი შეუჩერდა. სურსათის ეროვნული სააგენტოს განმარტებით, მეწარმე საქმიანობის გაგრძელებას მხოლოდ შეუსაბამობების სრულად აღმოფხვრისა და შესაბამის რეესტრში რეგისტრაციის შემდეგ შეძლებს.
