შინაგან საქმეთა სამინისტროს ინფორმაციით, აჭარაში ჩატარებული ფართომასშტაბიანი ოპერატიულ-სამძებრო და საგამოძიებო ღონისძიებების შედეგად, „ქურდულ სამყაროსთან“ კავშირში მყოფი 72 პირი დააკავეს, ხოლო კიდევ 5 პირს ბრალი წარედგინა. მათ შორის ერთ-ერთია ე.წ. „კანონიერი ქურდი“, რომელსაც ბრალი დაუსწრებლად წარედგინა.
უწყების ცნობით, დაკავებულებს ბრალად ედებათ „ქურდული სამყაროს წევრობა“, „ქურდული სამყაროს საქმიანობის მხარდაჭერა“, „ქურდულ შეკრებაში მონაწილეობა“, „ქურდული სამყაროს წევრისთვის მიმართვა“ და „კანონიერი ქურდობა“.
» აჭარაში სპეცოპერაციისას ერთი ადამიანი დაიჭრა
გამოძიებით დადგინდა, რომ ბრალდებულები ე.წ. ქურდულ გარჩევებს აწყობდნენ და იღებდნენ „ქურდულ გადაწყვეტილებებს“. ისინი უკავშირდებოდნენ ქურდული სამყაროს წარმომადგენლებს, მათ შორის ასლან ქობულაძეს, და პირადი სარგებლის მიღების მიზნით მოქალაქეებს შორის არსებული ფინანსური და სხვა სახის დავებს არეგულირებდნენ.
შსს ინფორმაციით, აღნიშნული „გარჩევების“ შედეგად, მხარეებს თანხის გადახდას აკისრებდნენ, ხოლო ვალდებულებების შეუსრულებლობის შემთხვევაში მათ ფიზიკური ანგარიშსწორებითა და სიცოცხლის მოსპობით ემუქრებოდნენ. გამოძიება საქართველოს სისხლის სამართლის კოდექსის რამდენიმე მუხლით მიმდინარეობს, რაც 15 წლამდე ვადით თავისუფლების აღკვეთას ითვალისწინებს.
» აჭარაში დაცვის პოლიციის მაღალჩინოსანი დააკავეს
შინაგან საქმეთა მინისტრმა ბრიფინგზე აღნიშნა, რომ ორგანიზებულ დანაშაულთან და ე.წ. „ქურდულ სამყაროსთან“ ბრძოლა ერთ-ერთი მთავარი პრიორიტეტია და ამ მიმართულებით უწყება მომავალშიც მკაცრ და უკომპრომისო პოლიტიკას გაატარებს.
» დაკავებული არიან ძმები წულუკიძეები
