შინაგან საქმეთა სამინისტროს ინფორმაციით, სპეციალურად შექმნილმა მუდმივმოქმედმა კომისიამ უკანონო ბრუნვიდან ამოღებული 626 კილოგრამი ნარკოტიკული საშუალება გაანადგურა.
უწყების ცნობით, აღნიშნული ნივთიერებების საერთო ღირებულება ე.წ. შავ ბაზარზე დაახლოებით 19 მილიონ ლარს შეადგენს.
ნარკოტიკების განადგურება საექსპერტო-კრიმინალისტიკური დეპარტამენტის თანამშრომლებმა სპეციალურ მაღალტემპერატურულ ღუმელში (ინსინერატორში) განახორციელეს.
განადგურებულ ნივთიერებებს შორის იყო სხვადასხვა სახის ნარკოტიკი, მათ შორის: კოკაინი, ჰეროინი, მეთადონი, MDMA, ამფეტამინი, კანაფი და სხვა ფსიქოტროპული და ახალი ფსიქოაქტიური ნივთიერებები.
