დაიწყო ბათუმის საფეხბურთო სტადიონისთვის სახელის ხელახალი შერჩევის პროცესი. შპს „აჭარის პროექტების მართვის კომპანიამ“ გამოაცხადა ელექტრონული აუქციონი ახალი კომერციული სახელის შესარჩევად.
„ბათუმის საფეხბურთო სტადიონის სახელწოდების ხელახალი შერჩევის, რეკლამისა და სხვა სახის უფლებებით სარგებლობის თაობაზე ელექტრონული აუქციონი გამოცხადდა. შპს „აჭარის პროექტების მართვის კომპანიის“ სახელმწიფო შესყიდვაში მონაწილე პრეტენდენტებმა წინადადებები მიმდინარე წლის 16 აპრილის ჩათვლით უნდა წარადგინონ“, – აღნიშნულია განცხადებაში.
გამარჯვებულ კომპანიასთან ხელშეკრულება 5 წლით გაფორმდება. სსიპ „ლევან სამხარაულის სახელობის სასამართლო ექსპერტიზის ეროვნული ბიუროს“ მიერ აუქციონის საწყისი ღირებულება 1 750 000 ლარით განისაზღვრა.
„ბათუმის საფეხბურთო სტადიონი“ (რომელსაც უეფას უმაღლესი, IV კატეგორია აქვს მინიჭებული) 2021 წლის 23 ივლისიდან „აჭარაბეთ არენის“ სახელწოდებით ფუნქციონირებს. აღნიშნულ კომერციულ სახელწოდებაზე ხელშეკრულების ვადა 2026 წლის ივნისში იწურება.
2021 წლიდან „აჭარაბეთ არენაზე“ „დინამო ბათუმი“ ასპარეზობს. ამ ხუთი წლის განმავლობაში სტადიონმა არაერთ საერთაშორისო მასშტაბის ღონისძიებას უმასპინძლა.
ავტორი: დიმიტრი გორგილაძე
