შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალებებისა და ფსიქოტროპული ნივთიერებების უკანონო შეძენა-შენახვის ბრალდებით, აზერბაიჯანის რესპუბლიკის ორი მოქალაქე – 1995 წელს დაბადებული ა.ა. და 1994 წელს დაბადებული ს.ზ. – სხვადასხვა დროს ბათუმში დააკავეს.
ბრალდებულების დროებითი საცხოვრებელი ბინების ჩხრეკის შედეგად ნივთმტკიცებად ამოიღეს სარეალიზაციოდ გამზადებული განსაკუთრებით დიდი ოდენობით ნარკოტიკული და ფსიქოტროპული საშუალებები, მათ შორის „მეთადონი“, „პრეგაბალინი“ და გამომშრალი მარიხუანა.
პოლიციამ ასევე ამოიღო ნარკოტიკული საშუალებების დაფასოებისთვის საჭირო მასალები.
გამოძიება საქართველოს სისხლის სამართლის კოდექსის 260-ე და 261-ე მუხლების მე-3 ნაწილის „ა“ ქვეპუნქტებით მიმდინარეობს, რაც სასჯელის სახით 20 წლამდე ან უვადო თავისუფლების აღკვეთას ითვალისწინებს.
