სახელმწიფო აუდიტის სამსახურმა სსიპ „სახმელეთო ტრანსპორტის სააგენტოს“ შესაბამისობის აუდიტი ჩაატარა, რომლის შედეგადაც გამოვლინდა არაერთი მნიშვნელოვანი ხარვეზი საერთაშორისო საავტომობილო გადაზიდვებისა და სამგზავრო გადაყვანების ნებართვების გაცემის პროცესში.
აუდიტის ანგარიშის მიხედვით, პრობლემები დაფიქსირდა მრავალჯერადი ნებართვების გასაცემ კონკურსებში, სადაც საკონკურსო კომისია ნებართვის მაძიებლებს სრულად დადგენილი კრიტერიუმებით არ აფასებდა. ასევე, რიგ შემთხვევებში შეფასების ქულები არ გამოიყენებოდა, რაც კონკურენტული პროცესის გამჭვირვალობას აზიანებდა.
დოკუმენტში აღნიშნულია, რომ კონკურსებში გამოვლინდნენ კომპანიები, რომლებმაც გამარჯვება ხარვეზიანი ან არასრულყოფილი დოკუმენტაციის პირობებში მოიპოვეს. აუდიტის ჯგუფს 776 განაცხადიდან 136 საერთოდ არ გადაეცა, ხოლო შესწავლილი შემთხვევებიდან ნაწილში გამარჯვებულებს სრულყოფილი დოკუმენტაცია არ ჰქონდათ წარმოდგენილი.
ანგარიშში ასევე საუბარია შემთხვევებზე, როდესაც მრავალჯერადი საერთაშორისო ნებართვები გაიცა კონკურსებში გამარჯვების დადასტურების გარეშე, რაც კონტროლის სისტემის სუსტ მექანიზმებზე მიუთითებს.
განსაკუთრებული ხარვეზები გამოვლინდა საერთაშორისო სამგზავრო და ECMT ნებართვების გაცემის პრაქტიკაში. აუდიტის მიხედვით, რიგ შემთხვევებში კომპანიებს აკლდათ აუცილებელი ტექნიკური და საკვალიფიკაციო დოკუმენტები, თუმცა მათ მაინც მიენიჭათ ნებართვები. ასევე დაფიქსირდა არავალიდური ან განუახლებელი დოკუმენტაციის გამოყენების შემთხვევებიც.
აუდიტი ყურადღებას ამახვილებს ნებართვების მართვის სისტემის გამჭვირვალობაზეც. კერძოდ, ნებართვების შესახებ საჯარო ინფორმაციის შეზღუდულ ხელმისაწვდომობაზე, რაც, ანგარიშის თანახმად, კომპანიებს შორის თანაბარი პირობების შექმნას ართულებს.
დოკუმენტში ასევე შეფასებულია მესამე ქვეყნების ნებართვების გაცემის პროცესი, სადაც დამატებითი ბარიერების შემოღება, მათ შორის ასოციაციის წევრობის ვალდებულება და ფინანსური შენატანები, აუდიტის შეფასებით, საჭირო დამატებით დასაბუთებას მოითხოვს.
სახელმწიფო აუდიტის სამსახურის დასკვნით, სააგენტოში ნებართვების გაცემის სისტემაში კონტროლისა და დოკუმენტირების მექანიზმები სრულყოფილად არ არის გამართული, რაც პროცესის ეფექტიანობასა და გამჭვირვალობას ამცირებს.
აქვე დაგაინტერესებთ ⇓
სატვირთოების მძღოლებმა სადგომებზე გადასახადების გაძვირების გამო აქცია გამართეს
სარფის საბაჟო ერთ დღეში 1309 სატვირთომ გადაკვეთა, რაც რეკორდული მაჩვენებელია – თურქული მედია
