2026 წლის პირველ კვარტალში საქართველოს ნავსადგურებსა და ტერმინალებში 4011 გემი შემოვიდა. მონაცემებს საქართველოს სტატისტიკის ეროვნული სამსახური ავრცელებს.
საქსტატის ინფორმაციით, შემოსული გემების 51.6% გენერალური ტვირთმზიდი იყო, 19.2% თხევადი ტვირთმზიდი, 19.2% კონტეინერმზიდი, ხოლო დარჩენილი 10% ნაყარი ტვირთმზიდებსა და სპეციალიზებულ გემებზე განაწილდა.
წინა წლის შესაბამის პერიოდთან შედარებით, საქართველოს ნავსადგურებმა 23%-ით ნაკლები თხევადი ტვირთმზიდი, 8.7%-ით ნაკლები სპეციალიზებული, 8.4%-ით ნაკლები გენერალური ტვირთმზიდი, 6.1%-ით ნაკლები კონტეინერმზიდი და 5%-ით ნაკლები ნაყარი ტვირთმზიდი გემი მიიღო.
ანგარიშის მიხედვით, 2026 წლის პირველ კვარტალში საქართველოს ნავსადგურებში შემოსული გემების 18.2% პანამის დროშის ქვეშ დაცურავდა, 13.7% თურქეთის, 10% ლიბერიის, 7.5% მალტის, ხოლო დანარჩენი 50.6% სხვა ქვეყნების დროშის ქვეშ იყო რეგისტრირებული.
ამავე პერიოდში საქართველოს ნავსადგურები 3.2 ათას მგზავრს მოემსახურა, რაც წინა წლის ანალოგიურ პერიოდთან შედარებით 53.6%-ით მეტია. მგზავრთა ნაკადში გასული მგზავრების წილი 55.3%-ს შეადგენდა და შემოსული მგზავრების მაჩვენებელს აღემატებოდა.
საქსტატის მონაცემებით, 2026 წლის პირველ კვარტალში საქართველოს ნავსადგურებმა და ტერმინალებმა ჯამში 4 316.9 ათასი ტონა ტვირთი გადაამუშავა, რაც წინა წლის შესაბამის პერიოდთან შედარებით 19.7%-ით მეტია. გადამუშავებული ტვირთის 49.1% გენერალური ტვირთი იყო, 30.4% თხევადი, ხოლო 20.4% ნაყარი ტვირთი.
