საქართველოს სახალხო დამცველმა ლევან იოსელიანმა პარლამენტში 2025 წლის ანგარიში წარადგინა, სადაც ადამიანის უფლებების მიმართულებით არსებული ძირითადი გამოწვევები შეაჯამა.
ანგარიშში განსაკუთრებული ყურადღება ეთმობა პენიტენციურ სისტემაში არსებულ პრობლემებს. ომბუდსმენის ინფორმაციით, კვლავ ფიქსირდება პატიმრების, მათ შორის არასრულწლოვანების, პირველადი შესახლების დროს სრული გაშიშვლებისა და ბუქნების გაკეთების მოთხოვნის პრაქტიკა, რაც დებულებებს ეწინააღმდეგება და დამამცირებელ მოპყრობად ფასდება.
დოკუმენტში საუბარია ასევე პატიმრების მხრიდან გაჭიანურებული და არასაკმარისი სამედიცინო მომსახურების შესახებ არსებულ საჩივრებზე, გადატვირთულობაზე და რესოციალიზაციის პროგრამების დეფიციტზე.
ანგარიშის მიხედვით, დახურული და განსაკუთრებული რისკის დაწესებულებებში მსჯავრდებულები დღეში 23 საათს საკნებში ატარებენ.
სახალხო დამცველის შეფასებით, პრობლემურია აქციებზე დაკავებულთა მიმართ მოპყრობის საკითხიც.
ანგარიშის წარდგენის დროისთვის ომბუდსმენის წარმომადგენლებმა ჯამში 573 დაკავებული მოინახულეს, რომელთაგან 302 სავარაუდო არასათანადო მოპყრობაზე მიუთითებდა, ხოლო 194-ს სხეულზე დაზიანებები აღენიშნებოდა.
ივნისის საპროტესტო აქციებთან დაკავშირებით მონახულებული 131 დაკავებულიდან 35 პოლიციის მხრიდან სავარაუდო არასათანადო მოპყრობაზე საუბრობდა.
დოკუმენტში საუბარია ოკუპირებულ ტერიტორიებზეც. სახალხო დამცველის განცხადებით, გაიზარდა უკანონო პატიმრობის ხანგრძლივობის შემთხვევები, ხოლო გალისა და ახალგორის სკოლებში დაწყებით კლასებში ქართულ ენაზე სწავლება სრულად ჩანაცვლდა უცხო ენის სტატუსით.
ომბუდსმენი ასევე აკრიტიკებს შეკრებისა და მანიფესტაციის თავისუფლების შემზღუდავ საკანონმდებლო ცვლილებებს და აცხადებს, რომ შესაბამისი ნორმების ნაწილი საკონსტიტუციო სასამართლოში გაასაჩივრა.
ანგარიშში ერთ-ერთ მთავარ გამოწვევად დასახელებულია საჯარო სექტორიდან თანამშრომლების სავარაუდო პოლიტიკური ნიშნით გათავისუფლების შემთხვევებიც.
ამასთან, ლევან იოსელიანმა პარლამენტს საკანონმდებლო წინადადებით მიმართა, რათა აღმოიფხვრას პრაქტიკა, რომლის მიხედვითაც ბრალდებულებს არასრულწლოვან შვილებთან კომუნიკაცია ავტომატურად ეზღუდებათ.
