საქსტატის მტკიცებით, საქართველოში 2024 წლის აღწერის მიხედვით, ქვეყნის მოსახლეობამ 3 929 581 ადამიანი შეადგინა. ეს 2014 წელთან შედარებით 5.8%-იანი ზრდაა.
მონაცემების მიხედვით, მოსახლეობის 62.5% ქალაქებში ცხოვრობს, ხოლო 37.5% სოფლად. ბოლო ათწლეულში ქალაქებში მოსახლეობა მნიშვნელოვნად გაიზარდა, სოფლებში კი შემცირდა.
ყველაზე დიდი ზრდა კვლავ დედაქალაქში დაფიქსირდა, თბილისის მოსახლეობა 1.33 მილიონს გადააჭარბა და 20%-ით გაიზარდა. რეგიონებში ზრდა განსაკუთრებით აჭარასა და ქვემო ქართლში გამოვლინდა, ხოლო გურიასა და სამეგრელო-ზემო სვანეთში კლება დაფიქსირდა. ქალაქებს შორის ყველაზე მაღალი მაჩვენებელი ბათუმშია – მოსახლეობა 54%-ზე მეტით გაიზარდა.
აღწერის მიხედვით, მოსახლეობის 52.1% ქალია, 47.9% კაცი. ასევე გაიზარდა ხანდაზმული მოსახლეობის წილი, რომელიც 17.6%-ს შეადგენს.
ეთნიკური შემადგენლობით მოსახლეობის 84.1% ქართველია. გაიზარდა აზერბაიჯანული, რუსული, ინდური და უკრაინული მოსახლეობის რაოდენობა.
რელიგიური მონაცემებით, მოსახლეობის 82% მართლმადიდებელია, ხოლო 11.1% მუსლიმი. ქართული ენა მოსახლეობის 85.1%-ისთვის მშობლიურია, თუმცა სხვა ენების გამოყენებაც გაიზარდა.
სასოფლო-სამეურნეო აღწერის მიხედვით, შემცირდა მეურნეობების რაოდენობა და რიგ კულტურებსა და პირუტყვზე კლება დაფიქსირდა. განსაკუთრებით შემცირებულია მსხვილფეხა პირუტყვი და ცხვარი, მაშინ როცა ფრინველი და ღორის რაოდენობა გაიზარდა.
საქსტატის შეფასებით, ბოლო ათწლეულში დემოგრაფიული ტენდენცია მკაფიოა, მოსახლეობა უფრო მეტად ქალაქებში კონცენტრირდება, ხოლო სოფლის მეურნეობა სტრუქტურულ ცვლილებებს განიცდის.
