ფინანსთა სამინისტროს საგამოძიებო სამსახურის ინფორმაციით, გახსნილია მასშტაბური დანაშაულებრივი სქემა, რომელიც ფსიქოტროპული მედიკამენტებით უკანონო ვაჭრობას, შემოსავლების ლეგალიზაციასა და უკანონო სამეწარმეო საქმიანობას უკავშირდება.
უწყების ცნობით, გამოძიების ფარგლებში ჩატარებულია 1000-ზე მეტი საგამოძიებო და საპროცესო მოქმედება. ამ ეტაპზე დაკავებულია ორგანიზებული ჯგუფის 17 წევრი, ხოლო 3 პირის მიმართ ძებნა გამოცხადდება. გარდა ამისა, 11 ფიზიკურ პირს ბრალდება დაკავების გარეშე წარედგინა, რადგან მათ გამოძიებასთან ითანამშრომლეს.
გამოძიებით დადგინდა, რომ ე.წ. „სააფთიაქო ნარკომანიის“ გავრცელებასთან დაკავშირებული ფართომასშტაბიანი ქსელი საქართველოში 2018-2025 წლებში მოქმედებდა. დანაშაულებრივ სქემას, უწყების ინფორმაციით, ფსიქოტროპული მედიკამენტების იმპორტიორი კომპანიების ხელმძღვანელები მართავდნენ.
გამოძიების თანახმად, მედიკამენტები ფიქტიური ფარმაცევტული კომპანიების სახელზე ფორმდებოდა, შემდეგ კი რეცეპტისა და შესაბამისი ნებართვის გარეშე, მაღალი ფასნამატით იყიდებოდა ქვეყნის მასშტაბით სხვადასხვა ობიექტში.
საგამოძიებო სამსახურის ინფორმაციით, ფსიქოტროპული მედიკამენტებით უკანონო ვაჭრობის შედეგად მიღებულმა შემოსავალმა 53 833 723 ლარი შეადგინა. საქმეზე დაყადაღებულია ბრალდებულებისა და მათთან დაკავშირებული პირების უძრავი და მოძრავი ქონება.
უწყების ცნობით, ბრალდებულთა შორის არიან სამედიცინო და ფარმაცევტული საქმიანობის რეგულირების სააგენტოს ყოფილი მაღალჩინოსნებიც.
გამოძიება საქართველოს სისხლის სამართლის კოდექსის 192-ე და 194-ე მუხლებით მიმდინარეობს, რაც 9-დან 11 წლამდე თავისუფლების აღკვეთას ითვალისწინებს.
