ბათუმის საკრებულო 30 ივნისს დაგეგმილ სხდომაზე ანგისას I შესახვევში მრავალბინიანი საცხოვრებელი კომპლექსის განაშენიანების დეტალური გეგმის დამტკიცების საკითხს განიხილავს.
პროექტი მოიცავს ანგისას I შესახვევის №12ა, №14, №14ა, №16, №18, №20, №24-ში და მიმდებარე ტერიტორიაზე მდებარე რვა მიწის ნაკვეთს.
ინიციატორი შპს „რეალ პალას დეველოპმენტია“, ხოლო პროექტი ბათუმის მერიის ქალაქგანვითარებისა და ურბანული პოლიტიკის სამსახურმა მოამზადა.
დოკუმენტების მიხედვით, გეგმარებითი ერთეულის საერთო ფართობი 7 765 კვადრატული მეტრია, ხოლო უშუალოდ საპროექტო ტერიტორია 3 652 კვადრატულ მეტრს მოიცავს.
დეტალური გეგმის მიხედვით, ტერიტორიაზე 33-სართულიანი, 103.7 მეტრი სიმაღლის მრავალბინიანი საცხოვრებელი სახლის მშენებლობა იგეგმება.
პროექტი ითვალისწინებს განაშენიანების ინტენსივობის კოეფიციენტის (კ-2) 3.5-დან 12.5-მდე გაზრდას. მოქმედი კანონმდებლობის შესაბამისად, ასეთი გადამეტების შემთხვევაში ინვესტორს მუნიციპალიტეტისთვის კომპენსაციის გაწევა მოუწევს.
დადგენილების პროექტის თანახმად, კომპანიას ორი ალტერნატივა ექნება: მუნიციპალიტეტს ე.წ. „შავ კარკასულ“ მდგომარეობაში გადასცეს საცხოვრებელი ფართები, ან გადაიხადოს მათი საბაზრო ღირებულება, რომელიც „თეთრი კარკასული“ ბინების შესაბამისი ფართობის მიხედვით განისაზღვრება.
დადგენილების პროექტით ასევე განსაზღვრულია, რომ ინიციატორმა პროექტირების ეტაპზე აჭარის ფინანსთა და ეკონომიკის სამინისტროს რეკომენდაციები უნდა გაითვალისწინოს.
„რეალ პალასის“ ჯგუფის მფლობელები და მათთან დაკავშირებული პირები ასევე დაკავშირებული არიან კომპანიებთან „რეალ პალასი“, „ბლექ სი თაუერსი“ და „რეალ პალას ქონსთრაქშენი“. ისინი მმართველი პარტიის „ქართული ოცნების“ შემწირველები არიან.
