„ეროვნული ფასეულობების დაცვის“ მოტივით შეიქმნა ახალი საინიციატივო ჯგუფი, რომლის ერთ-ერთი დამფუძნებელი ბათუმის თეატრის დირექტორი კოტე მჟავიაა.
ჯგუფი მსახიობმა გიორგი შანიძემ, რეჟისორმა გიორგი სიხარულიძემ და კოტე მჟავიამ დააფუძნეს.
საინიციატივო ჯგუფის წევრების განცხადებით, მათი მიზანია მომზადდეს შესაბამისი საკანონმდებლო ინიციატივა, რომელიც საქართველოს მართლმადიდებელი ეკლესიის, ეროვნული გმირების, ქართული ენის, ისტორიული მემკვიდრეობისა და ტრადიციული ღირებულებების სამართლებრივ დაცვას უზრუნველყოფს.
როგორც დამფუძნებლებმა პრესკონფერენციაზე განაცხადეს, ამ პროცესში გეგმავენ იურისტების, სამართლის სპეციალისტების, ისტორიკოსების, ხელოვნებისა და სპორტის სფეროს წარმომადგენლების, ასევე სხვა დაინტერესებული ჯგუფების ჩართვას.
„თითოეული ადამიანის გამოხატვის თავისუფლება უმნიშვნელოვანესი ღირებულებაა, თუმცა ეს უფლება არ შეიძლება იქცეს ინსტრუმენტად იმ სიწმინდეებისა და ფუნდამენტური ფასეულობების შეურაცხყოფისთვის, რომლებიც ქვეყნის ისტორიულ, კულტურულ და სულიერ საფუძველს წარმოადგენს“, – განაცხადა გიორგი შანიძემ.
რეჟისორ გიორგი სიხარულიძის განცხადებით, საინიციატივო ჯგუფი საქართველოს პარლამენტს მიმართავს და შესაბამისი კანონის მიღებაში დახმარებას სთხოვს.
„მივმართავთ საქართველოს პარლამენტს, ასევე იურისტებს, სამართალმცოდნეებს, ისტორიკოსებს, კულტურისა და სპორტის სფეროს წარმომადგენლებს, დაგვეხმარონ, ერთად გონივრულად მივიღოთ კანონი, რომელიც დაარეგულირებს ამ საკითხებს და აგვაშორებს იმ საფრთხეებს, რომლებსაც თითოეული ჩვენგანი ხედავს“, – განაცხადა გიორგი სიხარულიძემ.
ცნობილი თამადა ბათუმის დრამატული თეატრის სამხატვრო ხელმძღვანელად ინიშნება
„მთავრობასთან შევთანხმდი“ – ნუკრი ქანთარია ბათუმის დრამატულ თეატრს ტოვებს
