ბათუმის საქალაქო სასამართლომ მოქალაქე ირაკლი გობაძე პარტია „ძლიერი საქართველო – ლელოს“ წევრისთვის შეურაცხყოფის მიყენების საბაბით სამართალდამრღვევად ცნო და 1000 ლარით დააჯარიმა. გადაწყვეტილება მოსამართლემ ცოტა ხნის წინ, გამოაცხადა.
საქმე ერთ-ერთი ტელეკომპანიის ფეისბუკგვერდზე გამოქვეყნებულ ინფორმაციაზე ირაკლი გობაძის მიერ დაწერილ კომენტარს უკავშირდება.
კომენტარის გამო, შინაგან საქმეთა სამინისტრომ მის წინააღმდეგ საქმის წარმოება საქართველოს ადმინისტრაციულ სამართალდარღვევათა კოდექსის 166-ე მუხლის პირველი ნაწილით დაიწყო.
ირაკლი გობაძის ინფორმაციით, გამოძიების დაწყების ინიციატორი ოპოზიციური პარტია „ძლიერი საქართველო – ლელო“ არ ყოფილა. მისივე თქმით, სასამართლო პროცესზე მისი ინტერესების დამცველმა შუამდგომლობა დააყენა იმ პირის დაკითხვის შესახებ, რომლის შეურაცხყოფასაც ედავებიან, თუმცა მოსამართლემ აღნიშნული შუამდგომლობა არ დააკმაყოფილა.
გობაძე ასევე მიიჩნევს, რომ მის მიერ სოციალურ ქსელში დაწერილი კომენტარი სიტყვისა და გამოხატვის თავისუფლების ფარგლებში ჯდებოდა და სანქციას არ უნდა დაქვემდებარებოდა.
ირაკლი გობაძე სასამართლოს გადაწყვეტილებას არ ეთანხმება. მისი განცხადებით, განაჩენს სააპელაციო სასამართლოში გაასაჩივრებს, ხოლო იმ შემთხვევაში, თუ ზემდგომი ინსტანციაც მის წინააღმდეგ გადაწყვეტილებას ძალაში დატოვებს, საქმეს ადამიანის უფლებათა ევროპულ სასამართლოში გააგრძელებს.
