საქართველოს პროკურატურის ინფორმაციით, ყოფილ პრემიერ-მინისტრ ირაკლი ღარიბაშვილს განსაკუთრებით დიდი ოდენობით ქრთამის, წინასწარი შეთანხმებით ჯგუფის მიერ აღების ფაქტზე ბრალი წარუდგინეს.
პროკურატურის განცხადებით, საქმე 2021-2024 წლებში თავდაცვის სამინისტროს მიერ საიდუმლო შესყიდვებს ეხება. უწყების მტკიცებით, ჯუანშერ ბურჭულაძე, რომელიც იმ პერიოდში თავდაცვის მინისტრი იყო, ირაკლი ღარიბაშვილთან შეთანხმებით მოქმედებდა და მიზანმიმართული ქმედებებით ქმნიდა არაკონკურენტულ გარემოს.
პროკურატურის ცნობით, სამი საიდუმლო შესყიდვის ფარგლებში კომპანიებმა, რომელთა უკან დაკავშირებული პირები იდგნენ, თავდაცვის სამინისტროს 11 499 705 ლარის რეალური ღირებულების სამედიცინო აპარატურა და ინვენტარი 18 484 960 ლარად მიაწოდეს.
უწყების მტკიცებით, ბიზნესმენმა ჯამში 1,9 მილიონი ლარი ნაღდი ფულის სახით გადასცა ვასილ მხეიძეს. აქედან 400 ათასი ლარი მხეიძემ დაიტოვა, 1,5 მილიონი კი ჯუანშერ ბურჭულაძეს გადასცა. პროკურატურის ინფორმაციით, ბურჭულაძემ 750 ათასი ლარი თავად დაიტოვა, ხოლო დარჩენილი 750 ათასი ლარი რამდენიმე ეტაპად ირაკლი ღარიბაშვილს გადასცა.
პროკურატურის განცხადებით, აღნიშნული ქმედებების შედეგად სახელმწიფოს 6 985 255 ლარის ქონებრივი ზიანი მიადგა.
ირაკლი ღარიბაშვილს ბრალი სისხლის სამართლის კოდექსის 338-ე მუხლის შესაბამისი ნაწილებით წარედგინა, რაც სახელმწიფო-პოლიტიკური თანამდებობის პირის მიერ, ჯგუფურად, განსაკუთრებით დიდი ოდენობით ქრთამის აღებას გულისხმობს და 11-დან 15 წლამდე თავისუფლების აღკვეთას ითვალისწინებს.
პროკურატურის ინფორმაციით, ჯუანშერ ბურჭულაძე ამ საქმესთან დაკავშირებული ფაქტების გამო უკვე მსჯავრდებულია და მას 10 წლით თავისუფლების აღკვეთა აქვს შეფარდებული.
უწყება განმარტავს, რომ ირაკლი ღარიბაშვილის საქმეზე სასამართლოს მხოლოდ წინასასამართლო სხდომის განსაზღვრის მოთხოვნით მიმართავს, რადგან ყოფილი პრემიერი სხვა სისხლის სამართლის საქმეზე გამოტანილი გამამტყუნებელი განაჩენის საფუძველზე სასჯელს უკვე იხდის.
