მულტიმედია

აჭარა თაიმსი • The Ajara Times

აჭარა თაიმსი • The Ajara Times
„აჭარა თაიმსის“ ინფორმაციით, ბათუმში, კორპუსის მერვე სართულიდან ორ წლამდე ბავშვი გადმოვარდა. თვითმხილველების ინფორმაციით, მცირეწლოვანი ადგილზე დაიღუპა. მომხდარის ზუსტი მიზეზი ამ დროისთვის უცნობია. ფაქტზე სსკ 116-ე მუხლით დაიწყო გამოძიება, რაც გულისხმობს სიცოცხლის მოსპობას გაუფრთხილებლობით.
კორპუსის მერვე სართულიდან ორ წლამდე ბავშვი გადმოვარდა და დაიღუპა
60 წლის პედაგოგმა ერთიანი ეროვნული გამოცდები ჩააბარა და ბათუმის სახელმწიფო უნივერსიტეტის სტუდენტი გახდა. ინგა ბაგრატიონი თურქოლოგიის ფაკულტეტზე ჩაირიცხა. ინგა ბაგრატიონი წლებია აბიტურიენტებს ერთიანი ეროვნული გამოცდებისთვის ამზადებს. მასწავლებელი „აჭარა თაიმსთან“ საუბრისას ამბობს, რომ სწორედ მოსწავლეებთან მუშაობის პროცესში გაუჩნდა იდეა, თავადაც გამხდარიყო აბიტურიენტი. გადაწყვეტილება, როგორც თავად ამბობს, სპონტანურად მიიღო, აპლიკაცია მოსწავლეებთან ერთად შეავსო და გამოცდებისთვის მზადებას შეუდგა. დღეს ის უკვე ბათუმის სახელმწიფო უნივერსიტეტის თურქოლოგიის ფაკულტეტის პირველკურსელია. „ყველაფერი ძალიან სპონტანურად მოხდა. ვამზადებდი აბიტურიენტებს და მათთან ერთად გადავწყვიტე, მეც შემევსო აპლიკაცია. ასე აღმოვჩნდი გამოცდებზე“, - ამბობს ინგა ბაგრატიონი „აჭარა თაიმსთან“. უნივერსიტეტში დაბრუნებამდე მას უკვე ერთი უმაღლესი განათლება აქვს მიღებული. საჯარო სკოლის დასრულების შემდეგ სწავლა მინსკის პედაგოგიურ ინსტიტუტში, რუსული ფილოლოგიის მიმართულებით გააგრძელა. პროფესიით რუსული ენისა და ლიტერატურის მასწავლებელია. ინგას პროფესიული გზა ჩაქვში, რუსულ სკოლაში დაიწყო და იქ გატარებულმა წლებმა მისი პედაგოგიური გამოცდილების მნიშვნელოვანი ნაწილი შექმნა. 20 წლის განმავლობაში ის სკოლაში მასწავლებლად მუშაობდა, მოგვიანებით კი დირექტორის მოადგილის პასუხისმგებლობასაც ასრულებდა აღმზრდელობითი მიმართულებით. მოგვიანებით, რუსულ სექტორზე მოსწავლეთა რაოდენობის შემცირების გამო, ჩაქვის პირველი, ქართული და მეორე, რუსული სკოლები გაერთიანდა. ცვლილებების შემდეგ მან გარკვეული პერიოდის განმავლობაში გაერთიანებული სკოლის დირექტორის პოზიციაც დაიკავა. ინგასთვის პედაგოგობა მხოლოდ პროფესია არასდროს ყოფილა, ის მუდმივად ცდილობდა, ახალი ცოდნა და უნარები შეეძინა. 2010 წელს, როდესაც მასწავლებელთა სერტიფიცირების პროცესი დაიწყო, პროფესიული უნარების გამოცდა ჩააბარა. ერთი წლის შემდეგ კი ინგლისური ენისა და კომპიუტერული უნარების გამოცდებიც წარმატებით დაძლია. ამ გამოცდილებას მალე ახალი გამოწვევაც მოჰყვა. სახელმწიფო პროგრამის ფარგლებში მან არაქართულენოვან რეგიონში ქართული ენის სწავლება დაიწყო. 2011 წელს სამუშაოდ ახალქალაქის მუნიციპალიტეტის სოფელ ალასტანის არაქართულენოვან სკოლაში გაემგზავრა, სადაც ჯამში ათი წელი გაატარა. „თურქოლოგიით მაშინ დავინტერესდი, როდესაც ორჰან ფამუქისა და ელიფ შაფაქის შემოქმედებას გავეცანი, აღმოსავლური ლიტერატურის მიმართ ინტერესი გამიჩნდა. ის სრულიად განსხვავებული ლექსიკით გამოირჩევა და დასავლური კლასიკისგან მკვეთრად განსხვავებულ სამყაროს ქმნის“, - ამბობს ის. თურქეთთან და თურქულ კულტურასთან მისი ინტერესი მხოლოდ წიგნებით არ შემოიფარგლება. ინგა ბაგრატიონი სტამბოლში ორჯერ იმყოფებოდა. ქალაქმა, როგორც თავად ამბობს, მასზე განსაკუთრებული შთაბეჭდილება მოახდინა. „სტამბოლი უდიდესი იმპერიის დედაქალაქია და ჩემზე საოცრად შთამბეჭდავი შთაბეჭდილება დატოვა. მოკლედ, ყველაფერი, რაც თურქეთს ეხებოდა, ძალიან მაინტერესებდა“, - აღნიშნავს ინგა. ინგა დღეს ბათუმის ერთ-ერთ კერძო სკოლაში, რუსულენოვან სექტორში, ქართულ ენას ასწავლის. პარალელურად კი ახალი ეტაპისთვის ემზადება, სტუდენტური ცხოვრებისთვის. 60 წლის ასაკში აუდიტორიაში დაბრუნებას ის განსაკუთრებულ გამოწვევად არ აღიქვამს. პირიქით, მიაჩნია, რომ მისი ხასიათისა და ბუნების ადამიანს ახალგაზრდა კურსელებთან ურთიერთობა არ გაუჭირდება. „ვფიქრობ, მათთან საერთო ენას აუცილებლად გამოვნახავ. ასაკობრივი ბარიერი არ უნდა არსებობდეს“, - ამბობს ის. მისი გადაწყვეტილება ოჯახშიც არ ყოფილა ერთმნიშვნელოვნად აღქმული. ინგას ორი შვილი და ექვსი შვილიშვილი ჰყავს. ოჯახის წევრებს განსხვავებული რეაქციები ჰქონდათ, თუმცა საბოლოოდ ისინი მის გადაწყვეტილებას მხარს უჭერენ და გულშემატკივრობენ. ინგა ამბობს, რომ სიახლეების და განვითარების არასდროს ეშინოდა. მისი ცხოვრების გზაც ამის მაგალითია, პედაგოგიური საქმიანობა, ახალი პროფესიული გამოწვევები, არაქართულენოვან რეგიონში ათწლიანი მუშაობა, არაერთი გამოცდის ჩაბარება და ახლა უკვე ახალი სტუდენტური ცხოვრება. „რაც კი გამოცდა არსებობს, მგონი, ყველაფერი ჩაბარებული მაქვს“, - ამბობს ის ღიმილით. ახლა მის წინ კიდევ ერთი გამოცდაა, უნივერსიტეტში დაბრუნება 36 წლის შემდეგ და სრულიად ახალი პროფესიული მიმართულების, თურქოლოგიის, შესწავლა. ინგა ბაგრატიონისთვის კი ეს ასაკთან დაკავშირებული გამოწვევა ნაკლებად არის და უფრო ახალი შესაძლებლობაა, კიდევ ერთხელ დაამტკიცოს, რომ განვითარებასა და ახალი ცოდნის მიღებას ასაკი არ აქვს. 🔎 გვიპოვეთ სოციალურ ქსელებში 🔻 ▪️ ინსტაგრამი: https://www.instagram.com/ajara_times/ ▪️ იუთუბი: https://www.youtube.com/@TheAjaraTimes ▪️ ტიკტოკი: https://www.tiktok.com/@ajaratimes.ge ▪️ X: https://x.com/Ajaratimes ▪️ ტელეგრამი: https://t.me/ajaratimes_ge ▪️ ვოთსაპი: https://chat.whatsapp.com/HNZdijmvnp52XqvBCwE8xU ▪️ ჯგუფი: https://www.facebook.com/groups/ajaratimes.ge ▪️ ვებგვერდი: https://ajaratimes.ge/
60 წლის ასაკში სტუდენტი გახდა - ინგა ბაგრატიონი უნივერსიტეტში 36 წლის შემდეგ დაბრუნდა
⚠️ᲒᲐᲤᲠᲗᲮᲘᲚᲔᲑᲐ: ვიდეოში ასახულია ცხოველზე ძალადობის ფაქტი და კადრები შესაძლოა მძიმე სანახავი იყოს. შინაგან საქმეთა სამინისტრომ ბათუმის ახალ ბულვარში ძაღლზე ძალადობის ფაქტზე გამოძიება სისხლის სამართლის კოდექსის 259-ე მუხლით დაიწყო, რომელიც ცხოველის წამებას, მისდამი სასტიკ მოპყრობას ან სხვაგვარ ძალადობას გულისხმობს. მოქალაქეების მიერ მოწოდებულ ვიდეომასალაში ჩანს სამი პირი, რომლებიც მიუსაფარ ცხოველებზე ფიზიკურად ძალადობენ.
ძაღლზე ძალადობა
ბათუმში, თამარის დასახლებაში, პოლიციელები სამსახურებრივი ავტომობილებით ერთმანეთს შეეჯახნენ. თვითმხილველების თქმით, ერთმანეთს ორი პიკაპის ტიპის ავტომობილი შეეჯახა, რომლებშიც პოლიციის თანამშრომლები იმყოფებოდნენ. შსს-ში „აჭარა თაიმსს“ კითხვები უპასუხოდ დატოვეს
ავარია პოლიციელების მონაწილეობით
ბათუმში, გოგებაშვილის ქუჩაზე, საბაგიროს უკან, ზღვის სანაპიროზე რესტორნის მშენებლობა შეჩერებულია. ადგილზე სამშენებლო სამუშაოები რამდენიმე თვეა აღარ მიმდინარეობს და ტერიტორია მიტოვებულია. ორსართულიანი რესტორნის მშენებლობის ნებართვა ბათუმის მერიამ 2024 წელს გასცა. დოკუმენტის მიხედვით, ნებართვის მოქმედების ვადა 2026 წლის 20 აგვისტომდე იყო. აღნიშნული ტერიტორია ბათუმის მუნიციპალიტეტს 15-წლიანი იჯარით აქვს გასხვისებული. იჯარის ხელშეკრულების მიხედვით, მოიჯარეა შპს „555“, რომელმაც ქალაქის ბიუჯეტში ყოველწლიურად 72 550 ლარი უნდა გადაიხადოს. ღია წყაროების თანახმად, შპს „555“-ის მესაკუთრე და დირექტორი მარად აბულაძეა. მან 2020 წელს „ქართული ოცნება-დემოკრატიული საქართველოს“ 10 ათასი ლარი შესწირა. მარად აბულაძის თქმით, მშენებლობის პროცესის შეჩერება ფინანსურ პრობლემებს უკავშირდება. გვითხრა, რომ აღნიშნულ საკითხს აგვარებს და სამუშაოები მალე განახლდება. აბულაძის თქმით, სამშენებლო ვადებში ცვლილება შევიდა და ვალდებულებების შესრულების ვადა მომდევნო წლის თებერვლამდე გაგრძელდა. „რაღაც ფინანსური პრობლემებია, ვაგვარებ და განახლდება სამუშაოები. ცვლილება შევიტანეთ და თებერვლამდე გვაქვს ვადა. ცოტა ძვირი დაჯდა ეს პროექტი, ცოტა გაუთვალისწინებელი ხარჯებიც გვქონდა. ბანკთან ვაგვარებ და გაგრძელდება მალე“, – თქვა მარად აბულაძემ „აჭარა თაიმსთან“ საუბრისას. „აჭარა თაიმსის“ წყაროების ინფორმაციით, მარად აბულაძე აჭარის მთავრობის ყოფილი თავმჯდომარის, თორნიკე რიჟვაძის და მისი მამის, დავით რიჟვაძის თანასოფლელი და მათთან დაახლოებული პირია. მარად აბულაძესა და მის ბიზნესპარტნიორს რიჟვაძეებთან წლების განმავლობაში ახლო ურთიერთობა აკავშირებთ. მარად აბულაძე რიჟვაძეებთან ახლობლობას ადასტურებს, თუმცა კატეგორიულად უარყოფს, რომ მშენებლობის შეფერხება აჭარის მთავრობის ყოფილი თავმჯდომარის გარემოცვასთან რაიმე კავშირშია. „რა შუაშია? თორნიკე რიჟვაძე დაბადებული არ იყო, მე სამეწარმეო საქმიანობას რომ ვეწეოდი. სისულელეა, რასაც ამბობთ. მე როცა დავიწყე საქმიანობა, მაგ დროს თორნიკე რიჟვაძე იქნებოდა ბავშვი. ახლობლობა აჭარაში ვის უკვირს? სულხან, შეიძლება, რომ მოვიკითხოთ, მე და შენც აღმოვჩნდებით ნათესავები და შინაურები. აჭარა პატარაა. საიდან მოიტანეთ ეს თორნიკე რიჟვაძე, მიკვირს. 2012 წლამდეც მქონდა მე ქონება, მოდით, გაჩვენებთ. ყველაფერი მანამდე მაქვს გაკეთებული“, – თქვა მარად აბულაძემ „აჭარა თაიმსთან“ საუბრისას. „აჭარა თაიმსმა“ ბათუმის მერიას მიმართა. ჩვენ მუნიციპალიტეტისგან გვაინტერესებდა, დაირღვა თუ არა იჯარის ხელშეკრულებითა და სამშენებლო ნებართვით გათვალისწინებული ვალდებულებები, რა სანქცია ან სამართლებრივი ღონისძიება გაატარა მერიამ მოიჯარის მიმართ, რა გახდა პროექტის შეჩერების მიზეზი და იგეგმება თუ არა სამუშაოების გაგრძელება – მიუხედავად რამდენიმედღიანი ლოდინისა, უწყებამ ინფორმაცია არ მოგვაწოდა.
რესტორნის მშენებლობა შეჩერდა
ბათუმში, კიდევ ერთი ისტორიული სახლი, ბარათაშვილისა და კომახიძის ქუჩების გზაჯვარედინზე დაანგრიეს. ორსართულიანი სახლი 1910 წელს იყო აშენებული. ამჟამად შენობის ადგილზე მხოლოდ ნანგრევებია დარჩენილი. ადგილზე საინფორმაციო აბრა არ არის განთავსებული, შესაბამისად, უცნობია, რა ტიპის შენობის აშენება იგეგმება ისტორიული სახლის ნაცვლად. „აჭარა თაიმსს“ აჭარის კულტურული მემკვიდრეობის დაცვის სააგენტოში განუცხადეს, რომ აღნიშნულ სახლს კულტურული მემკვიდრეობის ძეგლის სტატუსი არ ჰქონდა.
ისტორიული სახლი დაანგრიეს
მახუნცეთში, მდინარე აჭარისწყალში ჩავარდნილი ტურისტები ადგილობრივებმა დახრჩობას გადაარჩინეს
ბათუმში რამდენიმე პირი ერთმანეთს ფიზიკურად დაუპირისპირდა. შემთხვევა ტბელ აბუსერიძის ქუჩაზე მოხდა. ერთ-ერთი ვერსიით, დაპირისპირება რესტორანში დაიწყო და მოგვიანებით აბუსერიძის ქუჩაზე გაგრძელდა. შემთხვევის ადგილზე პოლიციის ათამდე ეკიპაჟი იმყოფებოდა. შსს-ში „აჭარა თაიმსს“ განუცხადეს, რომ ადგილზე ერთი პირი ადმინისტრაციული წესით დააკავეს. ჩვენთვის უცნობია ინციდენტის გამომწვევი მიზეზი.
დაპირისპირება ბათუმში
„აჭარა თაიმსის“ ინფორმაციით, ბათუმში, მელიქიშვილის ქუჩაზე ერთი პირი დაჭრეს. ფაქტს წინ ურთიერთშელაპარაკება უძღოდა. დაჭრილი საავადმყოფოში გადაიყვანეს.
დაჭრა ბათუმში
გამოიწერე