შინაგან საქმეთა სამინისტროს ინფორმაციით, ბათუმში ჯგუფურად ჩადენილი ქურდობის ბრალდებით ორი არასრულწლოვანი დააკავეს. უწყების ცნობით, გამოძიებით დადგინდა, რომ ბრალდებულები წინასწარი შეთანხმებით, ჯგუფურად, ერთ-ერთ სასურსათო მაღაზიაში შეიჭრნენ, საიდანაც გასაყიდი პროდუქცია მოიპარეს და შემთხვევის ადგილიდან მიიმალნენ.
ორივე არასრულწლოვანი ბრალდებულის სახით დააკავეს. ნაქურდალი პროდუქცია ნივთმტკიცებად ამოიღეს. გამოძიების ფარგლებში ასევე ამოღებულია მაღაზიაში დამონტაჟებული სამეთვალყურეო კამერების ჩანაწერები.
შსს-ს ცნობით, დაკავებული არასრულწლოვნები ბათუმში სხვადასხვა დროს მომხდარ ქურდობის კიდევ რამდენიმე ფაქტშიც ფიგურირებენ. გამოძიება სისხლის სამართლის კოდექსის 177-ე მუხლის მე-2 და მე-3 ნაწილებით მიმდინარეობს, რაც 7 წლამდე ვადით თავისუფლების აღკვეთას ითვალისწინებს.
