ფოტო გენერირებულია AI-ის მიერ
ქედის მუნიციპალიტეტის მერიამ მაღალი გამავლობის (ჯიპი) მსუბუქი ავტომობილის შესყიდვა გადაწყვიტა. სახელმწიფო შესყიდვების სააგენტოს გვერდზე გამოქვეყნებული ინფორმაციით, ამ ეტაპზე უკვე მზადდება ხელშეკრულება.
ელექტრონულ ტენდერში ერთადერთი კომპანია მონაწილეობდა – შპს „ტოიოტა ცენტრი თეგეტა“. შემსყიდველისთვის შეთავაზებული ფასი 105 168 ლარია, ანუ იმდენი, რამდენიც შესყიდვის სავარაუდო ღირებულება იყო. მუნიციპალიტეტი თანხას ადგილობრივი თვითმმართველი ერთეულის ბიუჯეტიდან გადაიხდის.
ტექნიკური მოთხოვნების თანახმად, ავტომობილის ძრავი უნდა იყოს არანაკლებ 2,4 ლ, გადაცემათა კოლოფი – არანაკლებ 6-საფეხურიანი, უნდა ოთხივე ელექტროშუშით, მინიმუმ ოთხი უსაფრთხოების ბალიშით, აუდიოსისტემით, საჭის გამაძლიერებლითა და მოცურების საწინააღმდეგო სისტემით აღჭურვილი. აუცილებელი მოთხოვნაა, რომ წარმოდგენილი სატრანსპორტო საშუალება იყოს სალონზე დამოუკიდებელი ჩარჩოთი (body-on-frame), უგზოობისთვის მორგებული კონსტრუქციით. ასეთი კონსტრუქცია დამახასიათებელია მძიმე პირობებში გადაადგილებისთვის განკუთვნილი მაღალი გამავლობის ავტომობილებისთვის და უზრუნველყოფს მეტ მდგრადობას რთული რელიეფის პირობებში ექსპლუატაციის დროს. რაც შეეხება ფერს, ავტომობილი არ უნდა იყოს შავი.
კომპანიამ მერიას ავტომობილი მიმდინარე წლის 25 დეკემბრამდე უნდა მიაწოდოს.
შეგახსენებთ, რომ საქსტატის მონაცემებით, ქედის მუნიციპალიტეტში, ბოლო ორი წლის განმავლობაში, მოსახლეობის რაოდენობა 1 700 ადამიანით შემცირდა. 2026 წლის 1 იანვრის მდგომარეობით, მუნიციპალიტეტში 14 600 ადამიანი ცხოვრობს. აქედან 11 875 პირი რეგისტრირებულია მიზნობრივი სოციალური დახმარების პროგრამის მონაცემთა ბაზაში, ხოლო 4 934 პირი საარსებო შემწეობას იღებს.
შუახევსა და ქედაში სახელმწიფო ტყეში უკანონო კოტეჯები აღმოაჩინეს
