სახელმწიფო აუდიტის სამსახურმა ქედის მუნიციპალიტეტის 2022-2023 წლების საქმიანობის შესაბამისობის აუდიტი ჩაატარა, რომლის შედეგადაც ფინანსური რესურსების მართვის, სახელმწიფო შესყიდვების და შიდა კონტროლის სისტემაში არაერთი ხარვეზი გამოვლინდა.
აუდიტის ანგარიშის მიხედვით, 2022-2023 წლებში მუნიციპალიტეტს აუთვისებელი დარჩა 3,028,260 ლარის საბიუჯეტო რესურსი. დოკუმენტის მიხედვით, ეს ძირითადად ინფრასტრუქტურული პროექტების დაგეგმვა-განხორციელების ხარვეზებსა და საბიუჯეტო რესურსების არაეფექტიან მართვაზე მიუთითებს.
» რა ტიპის მშენებლობებზე გასცა ქედის მერიამ ნებართვები – 2023 წლის სტატისტიკა
ანგარიშში ასევე აღნიშნულია საწვავის ხარჯვასთან დაკავშირებული პრობლემები. აუდიტის დასკვნით, ქედის მუნიციპალიტეტის მერიაში არსებული შიდა კონტროლის სისტემა სრულყოფილად ვერ უზრუნველყოფს ავტოსატრანსპორტო საშუალებებისთვის შეძენილი საწვავის მიზნობრივად ხარჯვის დოკუმენტურად დადასტურებას.
ხარვეზები გამოვლინდა სახელმწიფო შესყიდვების პროცესშიც. კერძოდ, მზა ბეტონის შესყიდვის შემთხვევაში, ანგარიშსწორების ეტაპზე მუნიციპალიტეტმა არ შეაფასა ლაბორატორიული დასკვნების შესაბამისობა ხელშეკრულების პირობებთან. ასევე წარმოდგენილი დოკუმენტებით ვერ დგინდება, მიმწოდებელმა ბეტონი თავად დაამზადა თუ შეიძინა.
» ქედაში 16 უკანონო მშენებლობა გამოავლინეს – რა ტიპის დარღვევები დაფიქსირდა მუნიციპალიტეტში
აუდიტის თანახმად, მუნიციპალიტეტმა დამატებული ღირებულების გადამხდელად არარეგისტრირებულ პირებზე 17 შემთხვევაში შესაბამისი დასაბუთების გარეშე ზედმეტად გადაიხადა 26,910 ლარი, რაც საბიუჯეტო სახსრების არაეკონომიურ ხარჯვაზე მიუთითებს.
დოკუმენტში საუბარია შესყიდვების პროცესში პრეტენდენტების შეფასების ხარვეზებზეც. კერძოდ, მერიის მიერ სათანადოდ არ შეფასდა შპს „რაგი 444“-ის მიერ წინა პერიოდში ინფრასტრუქტურული პროექტების შეუსრულებლობის ფაქტი და სახელმწიფო შესყიდვების სააგენტოში დროულად არ იქნა წარდგენილი ინფორმაცია კომპანიის შავ სიაში რეგისტრაციისთვის.
» შუახევის მუნიციპალიტეტში ბიუჯეტის შესრულებას 3 მილიონ ლარზე მეტი დააკლდა
აუდიტმა ასევე გამოავლინა ხარვეზები კულტურული და სპორტული ღონისძიებების დაფინანსების, ასევე მუნიციპალიტეტის ბალანსზე არსებული სატრანსპორტო საშუალებების შეკეთებისა და მომსახურების ხარჯების დოკუმენტირებაში. რიგ შემთხვევებში ხარჯები გაწეულია სათანადო დოკუმენტაციის გარეშე.
» ზიპლაინი მაღალი ძაბვის გადამცემი ხაზების თავზე – სარისკო ატრაქცია ქედაში
პრობლემები დაფიქსირდა წარმომადგენლობით ხარჯებშიც – აუდიტის მიხედვით, რამდენიმე შემთხვევაში სრულყოფილი დოკუმენტაცია წარმოდგენილი არ იყო, რაც თანხების სათანადო დასაბუთების გარეშე განკარგვის რისკზე მიუთითებს.
დასკვნაში ასევე აღნიშნულია, რომ ქედის მუნიციპალიტეტი სათანადო ზედამხედველობას არ უწევს მის წილობრივ მფლობელობაში არსებულ შეზღუდული პასუხისმგებლობის საზოგადოებებს. სამი ასეთი კომპანიის ფინანსური შედეგი ჯამში 647,978 ლარის ზარალით დასრულდა, რაც მათი გადახდისუუნარობის ან გაკოტრების რისკებს ზრდის.
აუდიტის თანახმად, ავტოსატრანსპორტო საშუალებების დაზღვევის ხელშეკრულებით გათვალისწინებული უფლებების სრულად გამოუყენებლობამ და ავტოსაგზაო შემთხვევის ჩამდენი პირების მიმართ შესაბამისი ღონისძიებების გაუტარებლობამ ადგილობრივ ბიუჯეტს დამატებით არანაკლებ 6,693 ლარის ხარჯი დაუკავშირა.
» რა სახეობის ხეებს რგავენ აჭარის მუნიციპალიტეტებში
სახელმწიფო აუდიტის სამსახურის შეფასებით, მუნიციპალიტეტის შიდა კონტროლის სისტემა სრულყოფილად ვერ უზრუნველყოფს ინფრასტრუქტურული პროექტების შესრულების მონიტორინგს, საბიუჯეტო სახსრების მიზნობრივ და ეფექტიან ხარჯვას. ასევე მუნიციპალიტეტში არ გამოიყენება სამუშაო დროის აღრიცხვის სისტემა და რიგ შემთხვევებში არ ფიქსირდება შტატგარეშე ან შეთავსებით დასაქმებული პირების მიერ ხელშეკრულებით გათვალისწინებული სამუშაოების შესრულება.
» ხულოს მუნიციპალიტეტში სახელმწიფო შესყიდვებსა და ფინანსების მართვაში ხარვეზები გამოვლინდა – აუდიტი
