“მაუწყებელთა ალიანსის” ინფორმაციით, რეგიონული ტელევიზიების შემოსავლებმა გასულ წელს თითქმის 40% იკლო. მონაცემები კომუნიკაციების კომისიის კვლევას ეყრდნობა.
შედარებამ დაადასტურა, რომ თითქმის ყველა რეგიონულ საერთო – საინფორმაციო მაუწყებელს აქვს შემოსავლების კლება. მცირედი მატება ფიქსირდება მხოლოდ სამ ტელეკომპანიასთან – ქვემო ქართლის ტელევიზია, ტელეკომპანია თრიალეთი და ტელეკომპანია გურჯაანი.
“საყურადღებოა, რომ რეგიონული ტელევიზიების შემოსავლები მკვეთრად იყო შემცირებული 2022 წელსაც, 2021 წელთან შედარებით. საინფორმაციო სატელევიზიო რეგიონული მაუწყებლებიდან მუშაობა შეაჩერა ერთმა ტელეკომპანიამ. 24 არსებული მაუწყებლიდან ყოველდღიური საინფორმაციოს თვითწარმოებას დღეს მხოლოდ 4 მაუწყებელი ახერხებს,” – აცხადებენ მაუწყებელთა ალიანსში.
ინფორმაციისთვის: TMI რეგიონული მაუწყებლების დათვლა 2023 წლის აგვისტოში შეწყვიტა.
