პრეზიდენტი ახალგაზრდებს: დროშა თქვენ გეკუთვნით, თქვენ უნდა მიიტანოთ იქ, სადაც ქვეყნის მომავალია
ჩვენი დროშა არის ჩვენი ძალის გამოხატულება, დროშა წარმოადგენს ყველაფერს, რაც საქართველოს შეადგენს – მისი ღირებულებები, იდენტობა, მრწამსი, მისი ბრძოლები წარსულში და მისი გამარჯვებები დღეს და ხვალ, – ამის შესახებ საქართველოს პრეზიდენტმა, სალომე ზურაბიშვილმა ორბელიანების სასახლეში სახელმწიფო დროშის დღესთან დაკავშირებით გამართულ ღონისძიებაზე სიტყვით გამოსვლისას განაცხადა. ზურაბიშვილის თქმით, ყველას ვალია დროშის პატივისცემა და მისი დაცვა.
„სიამაყე, სიხარული, იმედი – ეს არის ის განცდები, რომლებიც მეუფლება მე და ალბათ თქვენც, როცა უყურებთ ამ დროშის შემოსვლას, აღმართვას. ეს დროშა წარმოადგენს ყველასთვის ძალიან ბევრს. პირველ რიგში, ეს არის ჩვენი სახელმწიფოს სიმბოლო, მისი სუვერენობის, დამოუკიდებლობის, იმის, რისთვისაც ჩვენი წინაპრები ძალიან დიდხანს იბრძოდნენ, კვდებოდნენ, რათა ეს დროშა ყოფილიყო ჩვენთვის პატივსაცემი და ჩვენთვის წარმოადგენდეს სწორედ ხვალინდელი დღის იმედს.
დროშა არის სიმბოლო ჩვენი ერთიანობის, იმის, რაც საქართველო იყო და რაც იქნება. ჩვენი დროშა არის ჩვენი ძალის გამოხატულება და მინდა, ეს ვუთხრა ახალგაზრდებს. ეს არ არის მხოლოდ რაღაც ისეთი მატერიალური სიმბოლო, დროშა წარმოადგენს ყველაფერს, რაც საქართველოს შეადგენს – მისი ღირებულებები, იდენტობა, მისი მრწამსი, მისი ბრძოლები წარსულში და მისი გამარჯვებები დღეს და ხვალ. ამიტომ ჩვენ ყველას გვევალება დროშის პატივისცემა და ამავე დროს უნდა ვგრძნობდეთ იმ პასუხისმგებლობას, რის გარეშეც ეს დროშა არაფერს ნიშნავს. ჩვენ, ყველანი, ვართ ძალიან ამაყი, როცა ვუყურებთ ჩვენს სპორტსმენებს უცხოეთში, როდესაც გამარჯვებულები უყურებენ, როგორ აღიმართება ქართული დროშა. მართლაც დიდი მადლობა მათ, რომ წარმოადგენენ ამ ფორმით და ამ კუთხით საქართველოს.
ჩვენ, ყველანი, ვართ ამაყი, როცა ვხედავთ, რომ საქართველოს დროშა უკვე არის ევროპის კანდიდატის სტატუსის მქონე ქვეყნის დროშა და ხვალ შეუერთდება ევროპული ქვეყნების დროშებს, რომ შეადგინოს ის ახალი, დიდი, ძლიერი ერთიანობა. ვიცით, რომ ჩვენი ჯარისკაცები ამ დროშის ქვეშ იცავენ ჩვენს ქვეყანას და დაიცავენ, სადაც საჭირო იქნება მუდამ, ყოველთვის და ამ ქვეყნის სუვერენობის გარანტი იქნებიან ისინი. ამისთვის ჩვენი პატივისცემა და მადლიერება. ეს დროშა ამ ყველაფერს წარმოადგენს და, ამდენად, არის ჩვენი დასაცავი, რადგან ის ჩვენ გვიცავს და იცავს იმ ფასეულობებს, რომლებიც გვაერთიანებს. დროშა ჩვენი ერთობის გარეშე კარგავს თავის ძალას, თავის დანიშნულებას. ამიტომ ვალდებული ვართ, ყველაფრის მიუხედავად, მივაღწიოთ იმ ძალიან დიდ ძალას ქვეყანაში და ნებისმიერ სახელმწიფოში, რასაც ჰქვია ხალხის ერთობა.
მინდა, ახალგაზრდებს გითხრათ, ეს დროშა თქვენ გეკუთვნით, თქვენი დასაცავია, თქვენ უნდა მიიტანოთ ეს დროშა იქ, სადაც ამ ქვეყნის მომავალია და არავის მისცეთ უფლება, რომ ამ დროშის ქვეშ ის ფასეულობები, რაც არსებობს, ვინმემ შეგვიცვალოს, სხვა სურათი გაიტანოს საქართველოსი. ყველას გესმით, დღეს რაზე ვსაუბრობ და არ მინდა, რომ ვისაუბრო, მაგრამ კარგად გესმით. თქვენ დაიცავით ეს ქვეყანა და ამით დაიცავთ ამ დროშას. ეს დროშა იქნება მუდმივად იმ მუდმივი საქართველოს სიმბოლო და მას გამარჯვებას ვუსურვებ“, – განაცხადა სალომე ზურაბიშვილმა.
