ბათუმში, რუსთაველის ქუჩის 20 ნომერში, ბრიტანეთის ყოფილი საკონსულოს ტერიტორიაზე სასტუმროს მშენებლობა დაიწყო. მაკეტის თანახმად, შენობა მიწის ზედაპირიდან შვიდ სართულიანი იქნება. მანამდე არსებული შენობა ორ სართულს არ აღემატებოდა.
ქალაქის ისტორიული ნაწილში, კულტურული მემკვიდრეობის ძეგლების დაცვის არეალში მრავალფუნქციური სასტუმროს მშენებლობის ნებართვას ხელს ბათუმის მერი აწერს.
მშენებლობის შესახებ დეტალური ინფორმაცია „აჭარა თაიმსმა“ უწყებიდან საჯარო ინფორმაციის მეშვეობით, 9 იანვარს მოითხოვა, თუმცა თვითმმართველობამ შესაბამისი დოკუმენტი დღემდე არ მოგვაწოდა.
ტერიტორიაზე საინფორმაციო დაფა შენობის დემონტაჟის შემდეგ განთავსდა, სადაც აღნიშნულია, რომ სასტუმროს შპს. „ORIX“ აშენებს, რომლის დირექტორი ზვიად ხავლოშვილია. ამ უკანასკნელთან კომუნიკაცია ვერ შევძელით. ტელეფონის ნომერზე, რომელიც დოკუმენტებშია მითითებული გვითხრეს, რომ ზვიად ხავლოშვილს ვერ დაგვაკავშირებენ.
ინფორმაციისთვის: ბათუმში, რუსთაველის 20 ნომერში XIX და XX საუკუნეებში ბრიტანეთის საკონსულო იყო განთავსებული. შენობაზე ბათუმის მერიამ 2014 წელს მემორიალური დაფა განათავსა.
