რეანიმაციის ახალი სტანდარტის ძალაში შესვლის შემდეგ, სამედიცინო დაწესებულებებში საწოლების რაოდენობა შემცირდა, რის გამოც ექიმი მზია ქედელიძე მთავრობის ახალ რეგულაციას აკრიტიკებს. “ნაციონალური მოძრაობის” წევრმა, დღეს გამართულ ბრიფინგზე იმ შედეგებზე ისაუბრა, რა რეალობის წინაშეც არიან კლინიკები აჭარაში.
ქედელიძის თქმით, ხშირ შემთხვევაში დაწესებულებები იძულებულები არიან, პაციენტების მიღებაზე უარს განაცხადონ, რაც სერვისების მიმღები პირის ჯანმრთელობის მდგომარეობას მნიშვნელოვნად აუარესებს.
“მთავრობის მიდგომები სამედიცინო დაწესებულებების მიმართ ვერ უძლებს ვერანაირ კრიტიკას. სხვადასხვა რეგულაციების შემოღების შედეგად კლინიკები იძულებულები გახდნენ კატასტროფულად შეემცირებინათ რეანიმაციული საწოლების რაოდენობა, რის შედეგადაც ვეღარ ხდება შესაბამისი პაციენტების მიღება. კლინიკები დღეების განმავლობაში ვერ ღებულობს პაციენტებს.
ჯარიმების აცილების მიზნით სხვა კლინიკებში ეძებენ ადგილს, რაც სარისკოა ასეთი ტიპის პაციენტებისთვის, კერძოდ, ვისაც სჭირდება სასწრაფო რეანიმატოლოგიური მკურნალობა.
ახალი რეგულაციები ცუდად მოქმედებს პაციენტის არსებულ მდგომარეობაზე. მკურნალობა, რომელზეც დამოკიდებულია პაციენტის შემდგომი სიცოცხლე და ჯანმრთელობა შეფერხებულია,” – განაცხადა ბრიფინგზე “ნაციონალური მოძრაობის” წევრმა მზია ქედელიძემ.
საქართველოს ჯანდაცვის ეს გადაწყვეტილება თავის დროზე ათეულობით ექიმმა გააპროტესტა, თუმცა მათი მოთხოვნები სამინისტრომ არ გაითვალისწინა.
ინფორმაციისთვის: რეანიმაციული სერვისის ყველა მიმწოდებელი ვალდებული იყო, ჯანდაცვის სამინისტროს მიერ წარმოდგენილი რეანიმაციული მომსახურების სანებართვო პირობები, 2023 წლის 1 სექტემბრამდე დაეკმაყოფილებინა.
სტანდარტი აწესებს შესაბამის პირობებს რეანიმაციული განყოფილების ინფრასტრუქტურული მოწყობის, აღჭურვილობის, ლაბორატორიული და დიაგნოსტიკური კვლევების, სპეციალური ოპერატიული პროცედურების, მომსახურების ხარისხის, სამედიცინო პერსონალის რაოდენობისა და განათლების ვალდებულების კუთხით. სანებართვო პირობების გარეშე, კლინიკას რეანიმაციული მომსახურების მიწოდების უფლება არ აქვს.
„საქართველოს 2022 − 2030 წლების ჯანმრთელობის დაცვის ეროვნული სტრატეგიის“ თანახმად, 2012-დან 2021 წლამდე, 100 000 მოსახლეზე საავადმყოფოების რაოდენობა მკვეთრად გაიზარდა და 4.9-დან 7.1-ს მიაღწია, რაც მნიშვნელოვნად აღემატება ევროკავშირის ქვეყნებში არსებულ საშუალო მაჩვენებელს, რომელიც 2,9-ს შეადგენს.
