“ნაციონალური მოძრაობის” წევრს მიაჩნია, რომ ხელისუფლება პრიორიტეტებს არასწორად ანაწილებს. რევაზ ხარაზის თქმით, ამის მაგალითი ბათუმის საკრებულოს სხდომაა, სადაც მისი შეფასებით, უმნიშვნელო საკითხებს განიხილავენ.
რევაზ ხარაზმა, საკრებულოს სხდომის დაწყებამდე აღნიშნა რომ მაშინ, როცა ქალაქში ასეულობით სოციალურად დაუცველია, ამ დროს ხელისუფლებამ მათ საჭიროებებზე უნდა ფიქრობდეს.
“ქართულო ოცნების 11 წლიანი მმართველობა განსაკუთრებით მძიმედ აისახება ჩვენს ქალაქზე. მე დღეს წამოვიღე სოციალური მომსახურეობის სააგენტოს მიერ, 2024 წლის იანვარში გამოქვეყნებული სტატისტიკა: დღეს, ჩვენს ქალაქში 11,977 ოჯახი არის რეგისტრირებული, უფრო კონკრეტულად გეტყვით, რომ 41,908 მოქალაქეა მიზნობრივი სოციალური დახმარების პროგრამის მონაცემთა ბაზაში. ეს ნიშნავს იმას, რომ ივანიშვილის ქართული ოცნების პირობებში, ჩვენი მოქალაქეებისათვის კიდევ უფრო მძიმე გახდა ცხოვრება. ამას ემატება ემიგრაციაში გადახვეწილი ჩვენი ახალგაზდრები და აქ დარჩენილი მოქალაქეები, რომლებიც ვერ პოულობენ სამსახურს. ჩვენი გუნდის მთავარ მიზანს წარმოადგენს, კვლავ დავუბრუნოთ ბათუმს ის განვითარება, რაც 2004-2012 წლებში გვქონდა. ეს ყველაზე კარგად მიშა სააკაშვილს და მის გუნდს – ერთიან ნაციონალურ მოძრაობას შეუძლია. ჩვენ, ერთხელ ეს შევძელით და სწორედაც 2024 წლის 26 ოტომბერს ხელისუფლების ცვლილებასთან ერთად, ჩვენ ვმუშაობთ კონკრეტულ პროექტებზე და პროგრამებზე, კონკრეტულ რეალურ ინვესტიციებზე, რომლითაც შევქმნით მაღალანაზღაურებად სამსახურებს. ჩვენ, ყოველწლიურად ახალი ინვესტიციებით და ახალი პროექტებით, 2024 წლიდან შევამცირებთ სიღარიბეს. არ შეიძლება ბათუმში ცხოვრობდეს ღარიბი სოციალური სტატუსის მატარებელი ოჯახი, ეს ხელისუფლების დანაშაულია,”- აცხადებს რევაზ ხარაზი.
