ქაქუთში მცხოვრებლები სოფლის ცენტრში არსებული ციტრუსის მიმღები საწარმოს გასხვისებას ეწინააღმდეგებიან. მათი თქმით, შენობა არსებობის მანძილზე მოსახლეობას ეკუთვნის და ისინი ინვესტორზე გადაცემას არ დაუშვებენ.
სოფლის ცენტრში დღეს საპროტესტო აქცია გაიმართა, სადაც განაცხადეს, რომ შენობა საკუთარი ძალებით ააშენეს და მოვლა პატრონობასაც წლებია მოსახლეობა უზრუნველყოფდა.
”ჩვენი ნაშრომით ავაშენეთ ეს შენობა. მთავრობა არ გვყავს, ხალხზე არ ფიქრობს. არ დავთმობთ და ჩვენს ძალას ვაჩვენებთ. 10 დღიან ვადას ვაძლევთ, რის შემდეგაც აჭარის მთავრობასთან ჩავალთ,”- განაცხადა ადგილობრივმა ჟუჟუნა ქარცივაძემ აქციაზე.
მოსახლეობის ინფორმაციით, შენობა აჭარის ფინანსთა და ეკონომიკის მინისტრის ახლობელს გადასცეს და ხალხის ინტერესი არ გაითვალისწინეს.
“ვფიქრობ მოსახლეობის მოთხოვნა სამართლიანია. ხალხის მიერ აშენებული და შენარჩუნებული შენობას ხელისუფლება დაუკითხავად არ უნდა ასხვისებდეს. თუ ხალხის მოთხოვნები არ იქნება გაითვალისწინებული ადგილობრივები ათი დღის შემდეგ შენობის თვითნებურად დაკავებას აპირებენ,”- განაცხადა თამაზ ბაკურიძემ.
ინფორმაციისთვის: შენობა 2013 წელს აჭარის ეკონომიკის სამინისტრომ სასოფლო სამეურნეო კოოპერატივ “აჭარის თემზე” გაასხვისა. ხელშეკრულების თანახმად, ობიექტში შინაური ცხოველების საკვების მომზადება იყო დაგეგმილი, თუმცა საწარმო დღემდე არ ფუნციონირებს.
მასალა მალე განახლდება
