რეგიონული განვითარებისა და ინფრასტრუქტურის მინისტრი ირწმუნება, რომ ბათუმის შემოვლითი გზის მშენებლობა 2024 წელს დასრულდება. ირაკლი ქარსელაძემ დღეს, სამშენებლო პროცესი მედიის გარეშე მოინახულა, ინფორმაცია კი უწყების პრესსამსახურმა გაავრცელა.
მინისტრის თქმით, მნიშვნელოვანი სამუშაოები უკვე შესრულებულია და შემოვლითი გზის მშენებლობა დასასრულს უახლოვდება.
,,ბათუმის შემოვლითი გზის ურთულესი პროექტი, რომლის მშენებლობა მიმდინარეობს რთულ გეოლოგიურ პირობებში, ბევრი გამოწვევის მიუხედავად წელს დასრულდება. კიდევ უფრო დიდი ძალისხმევის და გაზრდილი რესურსების პირობებში, შესაძლებელი იქნება აღნიშნული გზის სეზონისთვის გახსნა, რაც ძალიან მნიშვნელოვანია ბათუმისთვის. ხუთივე გვირაბი გაჭრილია, სამ გვირაბში უკვე დასრულებულია მოსახვა, საფარის დაგება. მიმდინარეობს საინჟინრო ქსელების მონტაჟი, დარჩენილ ორ გვირაბში გრძელდება მოსახვის სამუშაოები. 20 ხიდიდიდან 19 – აშენებულია. გარდა ამისა, ეწყობა საფარი და ეს ყველაფერი ხელშესახებს ხდის იმას, რომ წელს ნამდვილად დასრულდება ბათუმის შემოვლითი გზის ურთულესი პროექტი“ – ამის შესახებ მინისტრმა, ირაკლი ქარსელაძემ განაცხადა, რომლის კომენტარსაც რეგიონული განვითარებისა და ინფრასტრუქტურის სამინისტრო ავრცელებს.
ბათუმის შემოვლითი გზის მშენებლობის დასრულებას მთავრობა 2023 წელს პროგნოზირებდა, თუმცა სამუშაოები შეფერხებით მიმდინარეობდა, მეტწილად კი პროცესი საერთოდ შეჩერებული იყო.
ინფორმაციისთვის: სამინისტროს ცნობით, ბათუმის შემოვლითი გზის პროექტის ფარგლებში, 14 კმ-იანი 2 ზოლიანი ასფალტ-ბეტონის გზა, 20 სახიდე გადასასვლელი და 5 გვირაბი შენდება. ამ დროისათვის, პროექტით გათვალისწინებული ხუთივე გვირაბი გაჭრილია და 20 ხიდიდან აშენებულია 19 ხიდი.
შემოვლითი გზის შინაარსიდან გამომდინარე გათვალისწინებულია ორი კვანძი, რომლითაც ქალაქში შესვლა იქნება შესაძლებელი. ახალი შემოვლითი გზა გაივლის სოფლებს: მახინჯაურს, განთიადს, კაპრეშუმს, სალიბაურს, ფერიას, მახვილაურსა და ხელვაჩაურს.
პროექტს საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი, აზიის განვითარების ბანკისა და აზიის ინფრასტრუქტურის საინვესტიციო ბანკის 329 630 734 ლარის ფინანსური მხარდაჭრით ახორციელებს.
