ბათუმის მე-14 საჯარო სკოლის დირექტორს მოსწავლის ბულინგში ადანაშაულებენ. მშობელი „აჭარა თაიმსს“ უყვება, რომ ნატალია გოგუაძე კლასელების თანდასწრებით მის შვილს შეურაცხყოფას აყენებს.
შექმნილი ვითარების გამო, როგორც მშობელი ამბობს, იძულებული გახდა შვილი სხვა სკოლაში გადაიყვანოს. ლელა ვერძაძემ მინისტრს, მაია ხაჯიშვილს შესაბამისი, წერილობითი თხოვნით უკვე მიმართა.
„ჩემი შვილის მიმართ ხორციელდება ბულინგი, მათემათიკის მასწავლების მიერ, ამავდროულად ეს ქალბატონი არის სკოლის დირექტორი ნატალია გოგუაძე. ჩემი შვილი იმყოფება არათანაბარ მდგომარეობაში და აქვს მისი მხრიდან უფლება გადამეტებას, ეთიკის ნორმების მრავალჯერ და უხეშ დარღვევას.
მიმდინარე სემესტრის თებერვალში იყო შემთხვევა, როდესაც სკოლიდან მოვიდა ტირილით. ბავშვი ამბობდა სწორად დავწერე შემაჯამებელი და მასწავლებელმა არ მომისმინაო და ვერ შევძელი მისთვის სიმართლის დადასტურება. მრავალჯერ მოვიდა ბავშვი ატირებული სკოლიდან და მთხოვს, დავეხმარო, რომ მე-7 კლასიდან გადავიყვანო სხვა სკოლაში,“ – ამონარიდი იმ წერილიდან, რომელიც ლელა ვერძაძემ მინისტრს მიწერა.
ინფორმაციისთვის: მშობელმა დირექტორისა და მოსწავლის კომუნიკაციის დამადასტურებელი აუდიო ჩანაწერიც მოგვაწოდა, სადაც ნატალია გოგუაძის მხრიდან მოსწავლის მიმართ არაჯანსაღი დამოკიდებულება იკვეთება.
“რა ნიშანი გეკუთვნის? სამი, მაგრამ გიწერ ექვსს. მე ამას დავაქსეროქსებ და ისე გაგატან სახლში, იმიტომ რომ მერე რაღაცები არ ჩაამატო. ამდენი პრეტენზიები თუ იქნება მე ვერ შევძლებ თქვენთან მუშაობას. ბავშვებო მე ხომ ავხსენი, ყველაფერი ხომ იყო გასაგები (დირექტორი ითხოვს სხვა ბავშვების დადებით თანხმობას – ავტ.) შენ რატომ ვერ გაიგე ნ****? რა გინდა მითხარი, შენი ბრალდებების გამო კლასი დავტოვო? ბოლო-ბოლო ვიცით ათოსნები ვინებია, შენ სამოსანი გამოდიხარ. (დირექტორი ხმამაღლა კითხულობს სიას ვის შეუძლია სწავლა – ავტ.)
ათიანს დაგიწერ თუ მე პრობლემას არ შემიქმნი, მე და სკოლას. გავაკეთოთ ასე? და სხვებს ვეტყვი ბავშვებო არ გეწყინოთ სხვა გზა არ მქონდა. შენი თავი ვინ გგონია,” – ისმის ფარულ ჩანაწერში.
„აჭარა თაიმსი“ კომენტარისთვის ნატალია გოგუაძეს დაუკავშირდა, რომელმაც ბრალდებები სასტიკად უარყო და მოკლე განმარტებით შემოიფარგლა.
“ბრალდება სიმართლება არ შეესაბამება. ამ საკითხზე მოკვლევა დაწყებულია და გაირკვევა ყველაფერი. მე ახსნა განმარტება უკვე წარვადგინე,” – განაცხადა ნატალია გოგუაძემ ჩვენთან საუბრისას.
